چوارچێوەی هەماهەنگی ڕەتیدەکاتەوە لەگەڵ بەرپرسانی ئەمریکا کۆبوونەوەیان کردبێت

ئاڤا نیوز

چوارچێوەی هەماهەنگیی شیعەکان لە عێراق هەواڵەکانی کۆبوونەوەی بەشێک لە بەرپرسانی لەگەڵ ئەمریکییەکان ڕەتدەکاتەوە و دەڵێت، بەشداریی هیچ کۆبوونەوەیەک لەگەڵ بەرپرسانی ئەمریکا ناکەین.

چیرۆکی سەرەکی: لە ڕۆژانی ڕابردوودا، یەکێک لە ڕاوێژکارانی محەممەد شیاع سوودانی، سەرۆکوەزیرانی عێراق وتبووی، کە بەرپرسانی چوارچێوەی هەماهەنگی و ئەمریکا لەسەر یەک مێز کۆدەبنەوە و گفتوگۆ لەبارەی پرسە ئەمنی و سەربازییەکان دەکەن، ئەمەش چوارچێوەی هەماهەنگیی توڕە کرد و ئەو هەواڵەیان ڕەتکردەوە.

زانیاریی بەدەستهاتوو: چوارچێوەی هەماهەنگی سەبارەت بە لێدوانی ئەو ڕاوێژکارە ڕایگەیاند: بەتەواوی ناڕاستە، سەرکردەکانی چوارچێوەی هەماهەنگی بەشدارییان لە هیچ کۆبوونەوەیەکی ئەمنی و سەربازیدا نەکردووە و ناکەن کە هەر نوێنەرێکی هێزەکانی ئەمریکا بەشداریی تێدا بکات.

زانیاریی زیاتر: هاوپەیمانیەتییەکە دووپاتی دەکاتەوە، سەرکردایەتیی چوارچێوەی هەماهەنگی هیچ پەیوەندییەکی لەگەڵ هێزەکانی ئەمریکادا نییە و بەشداری هیچ کۆبوونەوەیەک لەگەڵ هیچ بەرپرسێکی ئەو وڵاتە نابن.