ئاڤای خەڵک؛ پارەی گەراج لە چەند پڕۆژەیەکی نیشتەجێبوون لە دهۆک وەردەگیرێت

ئاڤا نیوز

 

لە چەند پڕۆژەیەکی نیشتەجێبوون لە شاری دهۆک، وەرگرتنی پارەی مانگانە بۆ وەستاندنی ئۆتۆمبێل لە دانیشتووان کێشەی دروست کردووە و دانیشتووانی ئەو پرۆژە نیشتەجێبووانە داوای بەدواداچوون و چارەسەرکردنی ئەم بابەتە دەکەن.

بەدواداچوونی ئاڤا؛ پەیامنێری ئاڤا  لە دهۆک، ڕۆژهات لوقمان، بەدواداچوونی بۆ کێشەکە کردووە و دانیشتووانی ئەو پڕۆژانە دەڵێن، بۆ هەر مانگێک 25 هەزار دینار لە خاوەنی هەر ئۆتۆمبێلێک وەردەگیرێت.

 

بەیار عەبدولعەزیز، دانیشتووی یەکێک لەو پڕۆژانە، بە ئاڤا میدیای ڕاگەیاند: "ماڵ هەیە سێ ئۆتۆمبێلی هەیە و مانگانە دەبێتە 75 هەزار دینار بۆ گەراجی سەیارە، ئەمە لە کاتێکدایە کە کاتی کڕینی شوقەکە پێیان نەوتوون گەراج بە پارەیە."

لەلایەکی دیکە: پەیامنێرمان سەردانی ئیدارەی یەکێک لە پڕۆژەکانی کردووە، بەڵام ئامادە نەبوون لەسەر بابەتەکە هیچ لێدوانێک بدەن. ئاڤا زانیویەتی کە دوو ساڵ پێش ئێستا بەڕێوەبەرایەتیی وەبەرهێنانی دهۆک نووسراوی فەرمی بۆ یەکێک لە پڕۆژەکان کردووە و داوای ڕاگرتنی وەرگرتنی ئەو بڕە پارەیەی کردووە، بەڵام خاوەنی پڕۆژەکە پابەند نەبووە.

لێدوانی فەرمی: هەڤاڵ سدیق، بەڕێوەبەری وەبەرهێنانی دهۆک، بە ئاڤا میدیای ڕاگەیاند: "ئەو کەسانەی یەکەی نیشتەجێبوونیان لەو پڕۆژانە کڕیوە لە گرێبەستەکەدا بەوە ڕازی بوون کە گەراج بە پارەیە، بەڵام ئێستا ناڕازین." گوتیشی: "ناتوانین دەستکاری بڕیارەکە بکەین، بەڵام هەموو هەوڵێک دەدەین کە بە ڕێگەیەکی یاسایی گرفتەکە چارەسەر بکەین."

ئەمەش بزانە: لە شاری دهۆک 50 پڕۆژەی نیشتەجێبوون هەن، کە 10 پڕۆژەیان موڵکن. لە زیاتر لە سێ پڕۆژەدا پارەی گەراج وەردەگیرێت و ئەمەش کێشەی لێ کەوتووەتەوە. ئاڤا میدیا ئەوەشی زانیوە کە داواکاری گشتی سکاڵای لەسەر وەبەرهێنەرێکی دهۆک تۆمار کردووە و دانیشتنەکانی دادگەش سەبارەت بەم کەیسە بەردەوامە.