کێشەی نەبوونی پزیشک و کارمەندی تەندروستی و دەرمان لەنێو گرتووخانەی سلێمانی چارەسەر دەکرێت

ئاڤا نیوز

سەرچاوەیەک لەنێو بەڕێوەبەرایەتیی چاکسازیی گەورانی سلێمانی تایبەت بە ئاڤا ڕایگەیاند، هەفتەی داهاتوو کێشەی نەبوونی پزیشکی پسپۆڕ، کارمەندی تەندروستی، دەرمان و پێداویستی پزیشکی، لەنێو بنکەی تەندروستیی چاکسازیی گەورانی سلێمانی چارەسەر دەکرێن.

وێنە گەورەکە: خەرج نەکردنی پارە بۆ کڕین و دابینکردنی دەرمان و پێداویستیی پزیشکی، تەنها نەخۆشخانە و بنکە تەندروستییەکانی پارێزگای سلێمانی لێی زەرەرمەند نەبوو، بەڵکو کێشەی نەمانی دەرمان و پزیشکی پسپۆڕ، بووەتە قەیرانێکی گەورەی نێو گرتووخانەی سلێمانی، بۆ چارەسەرکردنی کێشەکەش وەزارەتی کار و کاروباری کۆمەڵایەتی، لایەنە پەیوەندیدارەکانی سەر بە وەزارەتەکەی ڕاسپارد، تا لەنزیکەوە بەدواداچوون بۆ ئەو کێشەیە بکەن.

زانیاریی بەدەستهاتوو: سەرچاوەیەک لەنێو گرتووخانەی گەورانی سلێمانی بە ئاڤای ڕاگەیاند، دوای سەردانەکەی ئەمڕۆی ئیحسان عەبدولڕەحمان، بەڕێوەبەری گشتیی چاکسازیی کۆمەڵایەتیی سلێمانی بۆ نێو گرتووخانەی گەورانی سلێمانی و بنکەی تەندروستیی نێو گرتووخانەکە، لەنزیکەوە بەدواداچوونی بۆ کێشە و کەموکوڕییەکانی حوکمدراوان کرد و دوای گفتوگۆکردن لەگەڵ بەڕێوەبەری گشتیی تەندروستیی سلێمانی، لە سەرەتای هەفتەی داهاتوو کێشەی نەبوونی پزیشکی پسپۆڕ و کارمەندی تەندروستی و دەرمان لەنێو بنکە تەندروستییەکە چارەسەر دەکرێت.

بەتەنیشت ئەم بابەتەوە: بەڕێوەبەری گشتیی چاکسازیی کۆمەڵایەتیی سلێمانی لە میانی سەردانە مەیدانییەکەیدا، سەردانی هۆڵی سزادراوانی ڤایرۆسی جگەری کرد و لەنزیکەوە گوێی لە داواکاری و پێشنیازەکانیان گرت، بە پێی یاسا و ڕێنماییەکان چارەسەری گونجاوی بۆ گرفتەکەیان دۆزییەوە.