پێشنیارکراوە بەشەخۆراکی سێ توێژ ببڕدرێت

ئاڤا نیوز

دوایی تەواوبوونی پرۆسەی بە ئەلیکترۆنیکردنی بەشەخۆراکی هاووڵاتییان، پێشنیارکراوە ئەو کەسانەی مووچەیان لە سەروو یەک ملیۆن دینارەوەیە بەشەخۆراکی مانگانەیان ببڕدرێت.

وێنە گەورەکە: حکومەتی عێراق ماوەی ساڵێکە دەستیکردووە بە ئەلیکترۆنیکردنی پسوولەی بەشەخۆراکی مانگانەی هاووڵاتییان لە سەرتاسەری وڵات، دوای تەواوبوونی بەشێک لە خزمەتگوزارییەکانی دیکەش دەبن بە ئەلیکترۆنی تاوەکو هاووڵاتییان بتوانن سەرجەم کارەکانیان لە ڕێگەیەوە بە ئۆنلاین جێبەجێ بکەن، داواشکراوە بەشەخۆراکی سێ توێژ ببڕدرێت. 

لێدوانی فەرمی: نەوزاد شێخ کامیل، بەڕێوەبەری گشتیی لە وەزارەتی بازرگانی و پێشەسازی حکومەتی هەرێمی کوردستان، بە ئاڤا میدیای ڕاگەیاند، ئەنجوومەنی باڵای ئابووری عێراق پێشنیاری کردوووە بۆ ئەنجوومەنی وەزیران، کە بەشەخۆراکی ئەو کەسانە ببڕدرێت مووچەکانیان لە یەک ملیۆن دینار بەسەرەوە بێت، هاوکات ئەو سەرۆک خێزانانەی مووچەکانیان لە یەک ملیۆن و 500 هەزار بەسەرەوە بێت بەشەخۆراکی تەواوی خێزانەکەیان ببڕدرێت، لە پێشنیارەکە ئاماژە بەوە کراوە ئەگەر ڕەزامەندی لەسەر درا لە 1-12-2025 جێبەجێ بکرێت.

زانیاریی زیاتر: نەوزاد شێخ کامیل دەڵێت، تائێستا نووسراوەکە بە فەرمی بۆ ئێمە نەهاتووە، بەڵام هەر کاتێک بۆ ئێمە بێت قسەی خۆمان دەبێت و ناکرێت لەم قۆناغە لە هەرێمی کوردستان جێبەجێ بکرێت، چونکە بارودۆخی کوردستان جیاوازە و بەهۆی نەناردنی شایستە داراییەکانی کوردستان لەلایەن بەغدا، مووچە لە کاتی خۆی دابەش ناکرێت و بڕیارەکە بۆ هاووڵاتیانی هەرێمی کوردستان قورسە، ئێمە لایەنی پەیوەندیدارمان ئاگادارکردووەتەوە ئەگەر پێشنیارەکە لەلایەن ئەنجوومەنی وەزیران پەسند بکرێت، هەرێمی کوردستان نەگرێتەوە لەم قۆناغەدا.

ئەمەش بزانە: لە پێشنیارەکە باس لەوەشکراوە ئەو هاوسەرانەی کە خانەنشین بوون ئەگەر مووچەی ئەو دوو کەسە بگاتە ملیۆن و نیوێک بەشەخۆراکی ئەوانیش ببڕدرێت، هەروەها داوا کراوە بەشەخۆراکی خاوەن کۆمپانیا و بەڵێندەرەکانیش ببڕدرێت.