فەلەکناسێک یەکەم ڕۆژی پایز دیاری دەکات

ئاڤا نیوز

لەگەڵ ئەوەی بەشی هەرە زۆری هاونیشتمانیان 21ـی ئەیلوول وەک یەکەم ڕۆژی پایز دیاری دەکەن، بەڵام فەلەکناسێک بەگوێرەی هەژماری فەلەکی ئەمڕۆ دیاری دەکات.

وێنە گەورەکە: پایز لە ئەدەب و هونەری کوردیدا ڕەنگدانەوەیەکی زۆری هەیە. بە لای بەشێک لە فۆتۆگرافەران یەکێکە لە وەرزە سەرنجڕاکێشەکان بۆ چرکاندنی وێنە. بەشێک لە شاعیرانیش هۆنراوەی سەرنجڕاکێشیان لەبارەی پایز نووسیووە، دیارترینیان، شیعری (پایز پایز)ـی گۆرانی شاعیرە کە هونەرمەند نەجمەدین غوڵامی کردوویەتی بە گۆرانی و (پایز)ـی محەممەد عومەر عوسمان کە هونەرمەند عەدنان کەریم کردوویەتی بە گۆرانی.

لێدوانی فەرمی: ئەژی چەتۆ حەسەن، سەرۆکی ڕێکخراوی فەلەکناسی کوردستان بە ئاڤای ڕاگەیاند: بیروباوەڕ وا هەیە کە دەڵێن 21ـی ئەیلوول یەکەم ڕۆژی پایزە، بەڵام ئەو تێگەیشتنە هەڵەیە و پاییز لە 20 بۆ 23ـی ئەیلوول دەستپێدەکات، گۆڕانی ڕۆژەکانیش پەیوەندی بە کەوتنی تیشکی خۆرەوەیە بە شێوەیەکی ستوونی لەسەر کەمەری زەوی، ئەمە یەکەم ڕۆژی پاییز دیاری دەکات.

زانیاریی زیاتر: بە گوتەی ئەژی چەتۆ، کاتژمێر 10:29ـی شەو بە کاتی هەولێر، تیشکی خۆر بەشێوەیەکی ستوونی بەر کەمەری زەوی دەکەوێت و ئەمڕۆ لەڕووی فەلەکییەوە دەبێتە یەکەم ڕۆژی پایز، هاوکات شەو و ڕۆژ دەبن بە 12 کاتژمێری یەکسان، لە نیوەگۆی باکوور پاییز دەبێ و لە نیوەگۆی باشوور سەرەتای بەهار دەبیت.