ئەو پێشمەرگانەی بڕوانامەی بەكالۆریۆسیان هەیە دەتوانن ببن بە مامۆستا

ئاڤا نیوز

وەزارەتی پەروەردە داوا دەكات هەر پێشمەرگەیەكی سەر بە وەزارەتی پێشمەرگە كە بڕوانامەی بەكالۆریۆسی هەیە لە چەند كۆلێژ و بەشێكی دیاركراو، دەتوانێت بەشێوەی تەنسیب خۆی بگوازێتەوە سەر وەزارەتی پەروەردە و ببێت مامۆستا.

وێنە گەورەكە: بە هۆی ئەوەی ئەمساڵ هەزاران مامۆستا لە هەرێمی كوردستان خانەنشین بوون و بۆشاییەكی زۆر لە قوتابخانەكان دروست بووە، وەزارەتی پەروەردە دەرگا بۆ بەشێك لە ئەو پێشمەرگانە دەكاتەوە كە بڕوانامەی بەكالۆریۆسیان هەیە بۆ ئەوەی ببنە مامۆستا.

زانیاریی بەدەستهاتوو: وەزارەتی پەروەردە نووسراوێكی ئاراستەی وەزارەتی پێشمەرگە كردووە و دەڵێ هەر پێشمەرگەیەك بڕوانامەی بەكالۆریۆسی هەبێت دەتوانێت وەك مامۆستا لە قوتابخانەكان دەوام بكات، بەڵام بەشێوەی تەنسیب نەك بە گواستنەوەی هەمیشەیی، ئاماژەی بە ئەوەش داوە كە ئەمە بۆ پڕكردنەوەی ئەو بۆشاییەیە كە لە میلاكی وەزارەتی پەروەردەدا دروست بووە.

زانیاریی زیاتر: بڕیارەكە ئەو پێشمەرگانە دەگرێتە كە بەكالۆریۆسیان لە بوارەكانی زانستە گشتییەكان، زمانەكانی ئینگلیزی، عەرەبی، كیمیا، فیزیا، بیركاری، هونەری، بایۆلۆجی و دەروونزانی هەیە.