قۆناغی دووەم لە پسوولەی ئەلیکترۆنی خۆراک دەستپێدەکات

ئاڤا نیوز

لەچەند ڕۆژی داهاتوو جارێکی دیکە ئەپلیکەیشنی پسوولەی خۆراک لە سەرتاسەری عێراق کارا دەکرێتەوە، لە قۆناغی داهاتوو هاووڵاتیان جگە لە خۆتۆمارکردن دەتوانن چەند مامەڵەیەکی دیکە لەنێو ئەپلیکەیشنەکە ئەنجام بدەن.

وێنە گەورەکە: بۆ نەهێشتنی مامەڵەی کاغەز لە سەرتاسەری هەرێمی کوردستان و عێراق پسوولەی خۆراک بەئەلیکترۆنی کراوە، ئێستا ئەپلیکەیشنەکە وەستاوە، بڕیارە لەچەند ڕۆژی داهاتوو کارا بکرێتەوە و تۆماکردنی هاووڵاتیان دەستپێبکاتەوە.

لێدوانی فەرمی: نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازی؛ بەئاڤای گوت، "بڕیارە سەرەتای مانگی داهاتوو لەسەرتاسەری عێراق ئەپلیکەیشنەکە کارا بکرێتەوە، هاووڵاتیان لەبەرامبەر بڕێک پارە دەتوانن مامەڵەکانیان ڕایی بکەن."

ئەوەی پێویستە بیزانیت: لە قۆناغی دووەم چەند خزمەگوزارییەک بەردەست دەبن لەوانە؛ خزمەتگوزاریی مامەڵەی هاووڵاتیان لە تۆماركردنی ناوی منداڵ و گواستنەوەی پسوولە لە بریكارێك بۆ بریكارێك یان لە شارێك بۆ شارێك، هەروەها تۆماركردنی ئەو كەسانەی كە هاوسەرگیریان كردووە و پسوولەی خۆراكیان نییە یان ئەوانەی كە لە دەرەوەی وڵاتن و بواریان نەبووە بگەڕێنەوە پسوولەكانیان تازە بكەنەوە.

ئەمەش بزانە: لە كۆی پێنج ملیۆن و  385 هەزار و  820 كەس كە پسوولەی خۆراكیان هەیە، چوار ملیۆن و 187 هەزار و 124 كەس پسوولەكانیان كردووەتە ئەلیکترۆنی، لەگەڵ کاراکردنەوەی ئەپلیکەیشنەکە ئەوانەی ماون دەتوانن خۆیان تۆماربکەن.