بە ژمارە؛ چەند ملیۆن کەس لە هەرێمی کوردستان مافی دەنگدانی هەیە؟

ئاڤا نیوز

 

گوتەبێژی کۆمیسیۆنی هەڵبژاردنەکانی عێراق دەڵێت، بۆ هەڵبژاردنی ئەمجارەی پەرلەمانی عێراق 29 ملیۆن کەس مافی دەنگدانیان هەیە لەو ژمارەیەش سێ ملیۆنیان لە هەرێمی کوردستانن.

 

وێنە گەورەکە: بڕیارە ڕۆژی 11ی مانگی 11ی ئەمساڵ هەڵبژاردنی پەرلەمانی عێراق بەڕێوەبچێت، کۆمیسیۆنی باڵای سەربەخۆی هەڵبژاردنەکانیش لای خۆیەوە بەردەوامە لە ئامادەکارییەکانی تاوەکو بە باشترین شێوە ئەو هەڵبژاردنە بەڕێوەببات.

 

لێدوانی فەرمی: جومانە غەلای، وتەبێژی کۆمیسیۆنی هەڵبژاردنەکان بە ئاڤای ڕاگەیاند: لە پارێزگاکانی دهۆک، هەولێر و سلێمانی زیاتر لە سێ ملیۆن و 68 هەزار کەس مافی دەنگدانیان لە هەڵبژاردنی داهاتووی پەرلەمانی عێراقدا.

 

ژمارەکان وا دەڵێن: بەگوێرەی ئەو لیستەی ناوبراو بە ئاڤای داوە، ژمارەی دەنگدەران لە سێ پارێزگاکەی هەرێمی کوردستان و ئەو پارێزگایانەی دەکەونە ناوچە کوردستانییەکانی دەرەوەی هەرێمی کوردستان کە ڕێژەی کوردی تێدا زۆرینەیە یان زۆرە بەم شێوەیەیە:

-دهۆک: 778 هەزار و  846 کەس.
-هەولێر: یەک ملیۆن و 87 هەزار و 880 کەس.
-سلێمانی: یەک ملیۆن و 201 هەزار و 658 کەس. 
-کەرکووک: 958 هەزار و 141 کەس.
-نەینەوا: دوو ملیۆن و 102 هەزار و 429 کەس.
-دیالە: یەک ملیۆن و 51 هەزار و 143 کەس.
-سەڵاحەددین: 861 و 156 کەس.

زانیاریی زیاتر: بەگوێرەی ئامارەکانی کۆمیسیۆن زیاتر لە 29 ملیۆن هاووڵاتی مافی دەنگدانیان لە هەڵبژاردندا هەیە، بەڵام تەنیا نزیکەی 21 ملیۆن هاووڵاتی کارتی بایۆمەتریان دەکردووە، ژمارەکەش بەم جۆرە دابەش بووە:

-   دەنگدەرانی گشتی 20 ملیۆن و 63 هەزار 773 دەنگدەر.
بۆ ئەم ژمارەیە، هەشت هەزار و 703 بنکەی دەنگدان و 39 هەزار و 285 وێستگەی دەنگدان تەرخان کراوە.

-  دەنگدەرانی تایبەت ملیۆنێک و 313 هەزار و 980 دەنگدەر.
ژمارەی بنکەکانی دەنگدانی تایبەت 809 بنکەیە، لەگەڵ چوار هەزار و 501 وێستگەی دەنگدان.

-    دەنگدەرانی ئاوارە 26 هەزار و 538 دەنگدەر.
بۆ ئاوارەکان،97  بنکەی دەنگدان و 321  وێستگەی دەنگدان دابین کراوە.