پێنج شەڕڤانی هەسەدە لە بۆسەیەکی داعشدا گیانیان لەدەست دا

ئاڤا نیوز

 

هێزەکانی سووریای دیموکرات 'هەسەدە' ڕایدەگەیێنێت، بەرەبەیانیی ئەمڕۆ پێنجشەممە، لە شارۆچکەی بەحرولوستا لە رۆژهەڵاتی دێرەزوور، بەهۆی هێرشێکی داعش، 5 شەڕڤانیان گیانیان لەدەست داوە و یەکێکی دیکەش بریندار بووە.

 

چیرۆكی سەرەكی: هێزەكانی سووریای دیموكرات، لە خاڵێكی ئەمنیی شارۆچكەی بەحرولوستا لە ڕۆژهەڵاتی دێرەزوور، بەرپەرچی پەلامارێكی چەكدارانی سەر بە شانە نووستووەكانی داعشیان داوەتەوە، لە ئەنجامی پووچەڵكردنەوەی ئەو هێرشەی داعش، پێنج شەڕڤان 'هەسەدە' گیانیان لەدەست دا و ئەندامێكی دیكەشیان بریندار بووە. 

 

زانیاریی بەدەستهاتوو: میدیاكانی نزیك لە هەسەدە، بە ئاماژەدان بە بەیاننامەیەكی ناوەندی ڕاگەیاندنی هێزەكانی 'سووریای دیموكرات' بڵاویان كردووەتەوە، هێزەكانیان ڕووبەڕووی شانە نووستووەكانی داعش بوونەتەوە و ئەو بەرەنگاربوونەوەیەش كوژراو و برینداری لێ كەوتووەتەوە.

 

لە بڵاوكراوەكە ئاماژە بەوەشكراوە، شەڕڤانانی هەسەدە ئازایانە ڕووبەڕووی هێرشی گرووپەكە بوونەتەوە و پیلانێكی تیرۆرستانیان پووچەڵكردووەتەوە كە هەوڵیان داوە لە ناوچەیەكی ئاوەدانیی پارێزگای دێرەزوور، كردەی تیرۆرستی ئەنجام بدەن. هەسەدە بەڵێنی تۆڵەسەندنەوەی خوێنی كوشتن و برینداركردنی شەش شەڕڤانی دەدات. هاوكات دووپات لە پابەندبوونی لە پاراستنی سەروماڵی هاووڵاتیانی مەدەنی و سەقامگیریی ناوچەكە دەكاتەوە.

 

ئەوەش بزانە: ناوەندی ڕاگەیاندنی هەسەدە داواش لە هاووڵاتیان دەكات، هاوكاری هێزە ئەمنییەكان بن و لەكاتی پێویستدا زانیاری بە هێزەكان بدەن كە یارمەتیدەر دەبێت بۆ پاراستنی ئاسایشی ڕۆژئاوای كوردستان.