وەزارەتی جەنگی ئەمریکا کۆبوونەوەیەکی خێرا ڕێکدەخات و پێنتاگۆن ناوەڕۆکەکەی بۆ ئاڤا ئاشکرا دەکات

ئاڤا نیوز

وەزارەتی جەنگی ئەمریکا کۆبوونەوەیەکی خێرا ڕێکدەخات و 800 فەرماندە و ئەدمیراڵی باڵای لە سەرانسەری جیهانەوە بانگهێشت دەکات، پێنتاگۆن ناوەڕۆکی کۆبوونەوەکە بۆ ئاڤا ئاشکرا دەکات، پێنتاگۆن سەدان فەرماندەی سەربازی بانگهێشتی کۆبوونەوەیەکی بەپەلە دەکات.

چیرۆکی سەرەکی: پیت هێگسێس، وەزیری جەنگی ئەمریکا، فەرمانێکی دەرکردووە بۆ زیاتر لە 800 فەرماندە و ئەدمیراڵی باڵای سەربازی، تا لە هەر شوێنێکی ئەم جیهانە هەن بەپەلە و بێ دواکەوتن بگەڕێنەوە بۆ ڤێرجینیای ئەمریکا، ئەمە بۆ ئەوەی کۆبوونەوەیەکی خێرا بکەن.

فەرمانەکە ئەوەندە بەپەلە بووە لە ڕێگەی ئینتەرنێت و ئۆنلاینەوە بۆ فەرماندەکان نێردراوە، تا یەکسەر بگاتە دەستیان.

ئەوەی لەبارەیەوە دەگوترێت: بەگوێرەی ڕاپۆرتێکی واشنتن پۆست، فەرمانەکە دراوە بە فەرماندەکان و هیچ ڕوونکردنەوەیەکیان لەو بارەوە پێ نەدراوە، تەنانەت فەرماندە باڵاکانیش نازانن مەسەلە چییە و کۆبوونەوەکە بۆ چییە؟ تەنیا ئەوەندە هەیە کە کۆبوونەوەکە هەفتەی داهاتوو و لە بنکەی هێزەکانی مارێنز لە ڤێرجینیا بەڕێوەدەچێت. 

بە گوێرەی سەرچاوەکە فەرماندەکان لە سەرتاسەری ئەمریکا و دەیان وڵاتی دیکەوە، لەوانەش وڵاتانی ئەوروپا، ڕۆژهەڵاتی ناوەڕاست و ئاسیاوە بانگهێشت کراون. 

لێدوانی فەرمی: لەبارەی ناوەڕۆکی کۆبوونەوەکە شان پارنێل، وتەبێژی پێنتاگۆن بە ئاڤای ڕاگەیاند، لە کۆبوونەوەکەدا پێت هێگست، وەزیری جەنگ وتارێک پێشکەشی سەرکردە باڵاکانی وەزارەتەکەی دەکات.

ئەوەی چاوەڕوان دەکرێت: وەزیری جەنگی ئەمریکا لەم وتارە چاوەڕوانکراوەدا باس لە ستراتیژی نوێ و ئاراستەی داهاتووی سوپای ئەمریکا بکات، بەتایبەتی لەم کاتە هەستیارەدا کە گرژییەکان لە ئاستی جیهانیدا لە زیادبووندان.