وەزارەتی ئەوقاف: بۆ دیاریکردنی ڕۆژی جەژن پشت بە هیچ وڵاتێک نابەستین

ئاڤا نیوز 

بە مەبەستی دیاریکردنی یەکەم رۆژی جەژنی ڕەمەزان، لیژنەی باڵای بینینی مانگ لە هەرێمی کوردستان ئێوارەی 29 ی ڕەمەزان کۆدەبێتەوە.

چیرۆکی سەرەکی: لە ئێوارەی ڕۆژی 29ی ڕەمەزان، ليژنەی باڵای بینینی مانگ بە هەماهەنگی لەگەڵ لێژنە لاوەکیيەکان لە پارێزگا و ئیدارە سەربەخۆکان  کۆدەبێتەوە، بە پشت بەستن بە بەڵگە شەرعییەکان و بەشداری یەکێتی زانایان و ئەنجوومەنی فەتوای هەرێمی کوردستان یەکەم ڕۆژی جەژنی ڕەمەزان دیاریدەکرێت.

لێدوانی فەرمی: نەبەز ئیسماعیل، گوتەبێژی وەزارەتی ئەوقافی هەرێمی کوردستان بە ئاڤا نیوزی ڕاگەیاند: "بۆ دیاریکردنی یەکەم ڕۆژی جەژنی ڕەمەزان، پشت بە هیچ وڵاتێک و فەلەکناسێک نابەستین و خۆمان بڕیار دەدەین".

ئەوەی پێویستە بیزانیت: وەزارەتی ئەوقاف و کاروباری ئاینی و لیژنەی باڵای بینينی مانگ، ڕایانگەیاندووە "ئەگەر مانگ بە بەڵگە ببینرێت لە ئێوارەی رۆژی 29 ی مانگ ئەوا ڕاستەوخۆ ڕۆژی دواتر دەبێت بە جەژن، بەڵام ئەگەر نەبینرێت ئەوا ڕەمەزان دەبێتە 30 ڕۆژی تەواو".