وەزیری بەرگری ئیسرائیل: ئەوەی لە غەززە بمێنێتەوە بە تیرۆریست لەقەڵەم دەدرێت

ئاڤا نیوز

وەزیری بەرگریی ئیسرائیل ڕایدەگەیەنێت هەرکەسێک لە بەشی باشووری غەززە بمێنێتەوە و ناوچەکانی خۆیان بەجێنەهێڵن بە تیرۆریست یان پشتیوانی تیرۆر لەقەڵەم دەدرێت.

وێنە گەورەکە: پلانی سەربازی ئیسرائیل بۆ کۆنترۆڵکردنی تەواوی غەززە بەردەوامە، لەدوای کۆنترۆڵکردنی بەشی باکووری غەززە بە پێی بڵاوکراوەی وەزارەتی بەرگری ئەو وڵاتە بەشی باشووری غەززە و کۆنترۆڵکردنی تەواوەتی غەززە ئامانجی سوپای ئیسرائیل دەبێت.

لێدوانی فەرمی: یسرائیل کاتز، وەزیری بەرگری ئیسرائیل لە لێدوانێکی رۆژنامەوانیدا ڕایگەیاند، سوپای ئیسرائیل لە قۆناغی کۆتایی کۆنترۆڵکردنی بەشی باکووری غەززەیە، دەبێت هەموو هاوڵاتیانی شارەکە لەڕێگای خاڵە پشکنینەکانی ئیسرائیلەوە شوێنەکانی خۆیان بۆ باکوور و ناوچەکانی ژێر دەسەڵاتی سوپا بەجیبهێڵن، بە پێچەوانەوە دەبنە ئامانجی سەربازی و بە تیرۆریست و پشتیوان لە تیرۆر دادەنرێن.

زانیاریی زیاتر: لێدوانەکانی وەزیری بەرگری ئیسرائیل لە کاتێکدایە واشنتن و تەلئەبیب چاوەڕوانی وەڵامی  حەماس دەکەن بۆ دەستپێشخەریەکەی دۆناڵد ترەمپ، سەرۆکی ئەمریکا کە پێشوەختە بنیامین نەتانیاهۆ، سەرۆکوەزیرانی ئیسرائیل  پەسەندکردنی دەستپێشخەریەکەی ڕاگەیاندووە.