بەهۆی نۆژەنکردنەوە شەقامێکی سەرەکی لە هەولێر دادەخرێت

ئاڤا نیوز

لەپێناو باشترکردنی ڕێگاوبان و ڕێکخستنەوەی شەقام، بەشێک لە شەقامی 100 مەتری نۆژەن دەکرێتەوە، بەوهۆیەوە بۆ ماوەیەک دادەخرێت.

ئاگادارکردنەوەی فەرمی: سەرۆکایەتیی شارەوانی هەولێر ئاگاداری هاووڵاتیان و شوفێران دەکاتەوە ڕۆژی سێشەممە 2025-10-07 بەمەبەستی نۆژەنکردنەوە، شەقامی 100 مەتری لە فلکەی باز تاوەکو یوتێرنی کۆلێژی جیهان دادەخرێت، داوا لە هاووڵاتیان و شوفێران دەکات هاوکار و هەماهەنگ بن ئەو ماوەیە شەقامی 120 مەتری وەک جێگرەوە بەکار بهێنن.

لێدوانی فەرمی: کارزان عەبدولهادی، سەرۆکی شارەوانی هەولێر، بە ئاڤای ڕاگەیاند، بەمەبەستی زیاتر خزمەتکردنی هاووڵاتیان ئەم شەقامە نۆژەندەکرێتەوە، نزیکەی سێ ملیار و 550 ملیۆن دیناری بۆ تەرخانکراوە، گوژمەکەی لەسەر بودجەی ئاسایی وەزارەتی شارەوانییە، کارەکانی بریتی یە لە هەڵگرتنی قیڕەکە و دووبارە قیڕکردنەوە، نزیکەی 13 هەزار مەتر چوار گۆشە نۆژەنکردنەوەی تێدایە، واتا هەردوو ساید نزیکەی هەشت کیلۆمەتر نۆژەنکردنەوەی بۆ دەکرێت، ماوەی پڕۆژەکەش 120 ڕۆژە.

زانیاریی زیاتر: جگە لە نۆژەنکردنەوە جوانکاری و هێلکاریش بۆ شەقامەکە دەکرێت.