ئاڤای خەڵک؛ لە ناوچەی پیشەسازی شەقڵاوە ئاوی ئاوەڕۆ تێکەڵ بە ئاوی خواردنەوە بووە

ئاڤا نیوز

لە ناوچەی پیشەسازی شەقڵاوە، بەهۆی شکانی بۆریی ئاوی خواردنەوە، ئاوەکە تێکەڵ بە ئاوەڕۆ بووە، نیگەرانی پیشەوەرانی لی کەوتووەتەوە و داوای چارەسەر دەکەن، قایمقامی شەقڵاوەش دەڵێت بە زووترین کات چارەسەری دەکەین.

چیرۆکی سەرەکی: ماوەی پێنج مانگە لە ناوچەی پیشەسازی شەقڵاوە، کێشەیەکی تەندروستی و ژینگەیی گەورە سەریهەڵداوە کە ژیانی پیشەوەران و دانیشتووانی ناوچەکەی خستووەتە مەترسییەوە. بەهۆی شکانی قفڵی بۆری بیرێکی ئاوەوە کە بۆ خواردنەوە بەکاردێت، ئاوی بیرەکە تێکەڵی ئاوەڕۆی ناوچەکە بووە.

زانیاریی بەدەستهاتوو: بەپێی گوتەی پیشەوەران و دانیشتووانی ناوچەکە، ماوەی ئەم پێنج مانگە ناچار بوون یان لەو ئاوە پیسبووە بخۆنەوە یان بڕێکی زۆر پارە بۆ کڕینی ئاوی پاک خەرج بکەن. داوا لە لایەنە پەیوەندیدارەکان دەکەن کە قفڵەکە بگۆڕن و کۆتایی بەم کێشە تەندروستییە بهێنن.

لێدوانی فەرمی: کاروان کەریم خان، قایمقامی قەزای شەقڵاوە، بە ئاڤای ڕایگەیاند: "بەدواداچوونمان بۆ کێشەکە کردووە و دڵنیایی دەدەین کە بە زووترین کات دەست بە چاککردنەوەی بۆرییە شکاوەکە دەکەین و کێشەکە بە یەکجاری چارەسەر دەبێت."