ئاڤای خەڵک؛ ئاڤا کێشەی کارمەندانی تەندروستیی هەولێر و ڕاپەڕین چارەسەر دەکات

ئاڤا نیوز

دوای بەدواداچوونی ئاڤا، دوو کێشەی گرنگی پەیوەست بە کارمەندانی خزمەتگوزاری لە نەخۆشخانەکانی هەولێر و ڕاپەڕین چارەسەر کران.

چیرۆکی سەرەکی: چەند ڕۆژێک پێش ئێستا، ژمارەیەک کارمەندی کارگوزاری لە یەکێک لە نەخۆشخانەکانی شاری هەولێر، گلەیی ئەوەیان کرد کە کۆمپانیای خزمەتگوزارییەکەیان مافیان دەخوات و پارەیەکی کەمتر لە شایستەی خۆیان پێدەدات.

لێدوانی فەرمی: ڕزگار زیاد، جێگری بەڕێوەبەری دەستەبەری کۆمەڵایەتی هەولێر، بە ئاڤای ڕاگەیاند: "لیژنەیەک سەردانی ئەو نەخۆشخانەیەی کردووە، لیژنەی دەستەبەریش دەچێت بۆ لایان. هەرچی کەموکوڕی هەیە دەستنیشانی دەکەین و کۆمپانیا هەر سەرپێچییەکی کردبێت، دەبێت چاکی بکاتەوە." بەمەش کێشەی مافی کارمەندەکان و شایستەکانیان خرایە ژێر چاودێری و بڕیارە چارەسەر بکرێت.

لەلایەکی دیکەوە: کێشەی دووەم تایبەت بوو بە کارمەندانی پاککردنەوەی نەخۆشخانەکانی ڕاپەڕین، کە بەهۆی تەواوبوونی گرێبەستی کۆمپانیای خزمەتگوزاری نەخۆشخانەکانەوە، مووچەی چوار مانگیان ڕاگیرابوو.

مەرد عەلی خاڵە، ئەندامی پەرلەمانی کوردستان، بە ئاڤای گوت: "ئەنجوومەنی وەزیران ڕەزامەندی داوە لەسەر خەرجکردنی مووچەی ئەو کارمەندانە و پێیان دراوە." هەروەها دڵنیایی دایە کارمەندەکان کە "لە کارکردنیش بەردەوام دەبن تاوەکو کۆتایی ساڵ و مانگانە مووچەیان پێدەدرێت."