ڕێگای سنە – کرماشان بووەتە ڕێگای مەرگ بۆ هاووڵاتییان

ئاڤا نیوز

بەهۆی ئەوەی زۆرترین ڕووداوی هاتووچۆ لەسەر ڕێگای سنە – کرماشان ڕوویانداوە، ناونراوە ڕێگای مەرگ بۆ هاووڵاتییانی ڕۆژهەڵاتی کوردستان. 

وێنە گەورەکە: خراپی کوالێتی ڕێگاوبانەکانی ئێران و جۆری ئەو ئۆتۆمبێلانەی هاووڵاتییان بەکاری دەهێنن، وایکردووە ڕووداوەکانی هاتووچۆ لە شارە جیاوازەکانی ئێران ڕوو لە زیادبوون بکات، ساڵانە بەهۆیەوە ژمارەیەکی زۆر لە هاووڵاتییان دەبنە قوربانی. 

لێدوانی فەرمی: حەمیدڕەزا عەبدولمەلەکی، بەڕێوەبەری پۆلیسی هاتوچۆی پارێزگای سنە لەوبارەیەوە ڕایگەیاند: زۆرینەی ڕووداوەکان لە ڕۆژانی پێنجشەممە و هەینی لەسەر ئەو ڕێگایە ڕوودەدەن، هۆکارەکەشی بۆ پابەندنەبوونی شۆفێرانە بە ڕێنماییەکانی هاتووچۆ و تیژڕۆییە، زۆرینەی ئەو ڕووداوەش بە ئۆتۆمبێلی جۆری پیجۆی 405 کراوە.


- بەڕێوەبەری پۆلیسی هاتووچۆ سنەی باسیش لەوەدەکات، پێویستە دایک و باوکان ڕێگە بە منداڵەکانیان نەدەن شۆفێری بکەن چونکە زۆرینەی ڕووداوەکان بەهۆی کەسانی بێ مۆڵەتەوە بووە. 

- کەمی ئاستی هۆشیاری شۆفێران وایکردووە کە ئێستا لە ڕێگای گوندەکانیش ڕووداوی هاتووچۆ ڕوو لە زیادبوون بکات.