یەکێتی لەبارەی لەدەستدانی کورسییەکی لە دیالە ڕوونکردنەوە دەدات

ئاڤا نیوز

یەکێتیی نیشتمانی کوردستان دوو کورسی لە بازنەی دیالە و بازنەی سەڵاحەددین لەدەستداوە، لە بەرامبەردا پارتی دیموکراتی کوردستان لە بازنەی دیالە کورسییەکی بەدەستهێناوە.

وێنە گەورەکە: ئێوارەی ڕۆژی چوارشەممە 12-11-2025، کۆمیسیۆنی باڵای سەربەخۆی هەڵبژاردنەکانی عێراق ئەنجامی بەرایی هەڵبژاردنی ئەنجوومەنی نوێنەرانی ڕاگەیاند و دەنگی لایەنەکانی لە کۆنگرەیەکی ڕۆژنامەوانیدا خستەڕوو.

چیرۆکی سەرەکی: یەکێتیی نیشتمانی کوردستان لە هەڵبژاردنی ئەنجوومەنی نوێنەرانی عێراق لە ساڵی 2021، دوو کورسی لە بازنەی دیالە و بازنەی سەڵاحەددین بەدەستهێنابوو، بەڵام لە هەڵبژاردنی 2025 بەهۆی کەمکردنی دەنگەکانیەوە هەردوو کورسییەکەی لەدەست دا.

ڕاگەیێنراوی فەرمی: بازنەی هەڵبژاردنی دیالە - خانەقین لەبارەی لەدەستدانی کورسییەکەیان لە ڕوونکردنەوەیەکدا ڕایگەیاند: ئەمە قۆناغی ڕاستکردنەوە و پێداچوونەوە و بەدواداچوون بۆ خاڵە لاوازەکانمان دەکەین، گۆڕانکاری ڕیشەیی لەسەر ئاستی سیاسی و بەرپرسیارێتییەکان لە دیالە و خانەقین دەکەین.

زانیاریی زیاتر: لە ڕوونکردنەوەکەی یەکێتیی نیشتمانیدا هاتووە، بەهۆی بەرزبوونەوەی ڕێژەی دەنگدان لە بازنەی دیالە بۆ زیاتر لە 55٪ کە دەکاتە زیاتر لە 600 هەزار دەنگ، یەکێتی 29 هەزار و 44 دەنگی بەدەستهێناوە، بۆیە نەمانتوانی کورسییەکە بەدەستبهێنین.

لەلایەکی دیکەوە: مەلا شوکر کەریم، کاندیدی یەکێتی نیشتمانی کوردستان لە بازنەی سەڵاحەددین، 14 هەزار و 843 دەنگی بەدەستهێناوە، بەڵام بەهۆی کورسی کۆتایی ئافرەت ناتوانێت بۆ ئەنجوومەنی نوێنەرانی عێراق سەربکەوێت، بۆیە یەکێتی ئەم کورسیەی لە بازنەی سەڵاحەددین لەدەست دا.

ئەوەی پێویستە بیزانیت: لەم هەڵبژاردنەدا پارتی دیموکراتی کوردستان لە بازنەی دیالە کورسییەکی بەدەستهێناوە، کاندیدێکی بە ناوی نازک ئەحمەد لەنێو هاوپەیمانیی عەزم بۆ ئەنجوومەنی نوێنەرانی عێراق سەرکەوت.