خەسرۆ گۆران: لە كۆی نۆ كورسیی كۆتای پێكهاتەكان؛ پێنجیان بووە پشكی نزیكانی پارتی

ئاڤا نیوز

"لە كۆی نۆ كورسییەكەی كۆتای پێكهاتەكان، پێنجیان بووە بەشی ئەو كاندیدانەی كە نزیكی پارتین".

چیرۆكی سەرەكی: ڕۆژی چوارشەممە 12ـی تشرینی دووەمی 2025، كۆمیسیۆنی باڵای سەربەخۆی هەڵبژاردنەكانی عێراق، ئەنجامە بەراییەكانی هەڵبژاردنی خولی شەشەمی ئەنجوومەنی نوێنەرانی عێراقی ڕاگەیاند، بەگوێرەی ئەنجامەكان، سێ كورسیی پێكهاتەی مەسیحی و كورسییەكەی كوردانی فەیلی و كورسیی كوردی ئێزدی، بووە بەشی ئەو كاندیدانەی كە لە پارتییەوە نزیكن.

لێدوانی فەرمی: خەسرۆ گۆران، بەرپرسی لقی 14ـی پارتی لە مووسڵ، تایبەت بە ئاڤا ڕایگەیاند، لە نۆ کورسیی کۆتا لە عێراق، پێنجیان کە نزیک و دۆستی پارتین دەرچوون بۆ پەرلەمانی عێراق، چوارەكەی دیكەش لەلایەن حیزب و لایەنی دیكەوە پشتیوانی دەكرێن.

ئەوەی پێویستە بیزانیت: هەریەك لە كلدۆ ڕەمزی، سامی ئوشانە و عیماد یوخەننا لە پێكهاتەی كریستیان، زۆرترین دەنگیان بەدەستهێناوە و كورسیی پارێزگاكانی هەولێر و دهۆك و كەركووكیان بردووەتەوە، حەیدەر عەلی، كورسیی كوردانی فەیلی و خالید سیدۆ، كورسیی كوردانی ئێزدی بردەوە كە سەرجەمیان نزیكی پارتین.

ژمارەكان وا دەڵێن: كورسیی كریستیانەكان لە پارێزگای هەولێر، بووە بەشی  كلدۆ رەمزی، كە 18 هەزار و 474 دەنگی هێناوە.

كورسیی كریستیانەكان لە پارێزگای دهۆك: سامی ئوشانە بەدەستیهێنا كە 22 هەزار و 836 دەنگی هێناوە.

كورسیی كریستیانەكان لە پارێزگای كەركووك: عیماد یوخەننا لە پێكهاتەی مەسیحی 17 هەزار و 602 دەنگی هێناوە.

كورسیی كوردانی فەیلی لە پارێزگای واست؛ بووە بەشی حەیدر عەلی كە 17 هەزار و 174 دەنگی هێناوە.

كورسیی كوردانی ئێزدی لە پارێزگای نەینەوا؛ خالید سیدۆ بەدەستیهێنا كە نۆ هەزار و 686 دەنگی هێناوە.