چوارچێوەی هەماهەنگی: پێش 9ـی 1ـی ساڵی داهاتوو ناوی کاندیدی سەرۆکوەزیران ئاشکرا دەکرێت

ئاڤا نیوز

سەرچاوەیەک لە چوارچێوەی هەماهەنگی ئاشکرای کردووە، ناسنامەی سەرۆکوەزیرانی داهاتوو پێش 9ـی کانوونی دووەمی ساڵی داهاتوو ڕادەگەیێنرێت.

چیرۆکی سەرەکی: هەفتەی ڕابردوو، هەڵبژاردنی پەرلەمانی عێراق بەڕێوەچوو، لایەنەکانی چوارچێوەی هەماهەنگی نزیکەی 170 کورسییان هەیە و بەپێی عورفی سیاسی پۆستی سەرۆکایەتیی ئەنجوومەنی وەزیران بە پێکهاتەی عەرەبی شیعە دەدرێت.

زانیاریی بەدەستهاتوو: سەرچاوەیەک لە هاوپەیمانیی چوارچێوەی هەماهەنگیی بۆ میدیا عێراقییەکان ڕایگەیاند: دەستوور مافی درێژەدان بە کارەکانی پەرلەمان و لێپرسینەوە و دەنگدان لەسەر یاساکان دەداتە خولی پێنجەمی ئێستای پەرلەمان تا 8ـی 1ـی 2026، لە دوای ئەم وادەیە خولی پێشوو بە کۆتا هاتوو دادەنرێت.

سەرچاوەکە ئاماژەی بەوەکرد، "چوارچێوەی هەماهەنگی لەو بەروارەدا ئامادەدەبێت بۆ ڕاگەیاندنی ناوی سازان لەسەرکراوی سەرۆکایەتیی وەزیران، پرۆسەی پێکهێنانی حکومەت خێرایە بەتایبەتی لەژێر ڕۆشنایی بوونی لێکتێگەیشتنی گرنگ لەگەڵ لایەنەکان سەبارەت بە یەکلاکردنەوەی بەرنامەی حکومەت و هاوپەیمانیی هاوبەشی نیشتمانی لەنێوان ئەو هێزانەی نوێنەرایەتیی پێکهاتەکان دەکەن".

زانیاریی زیاتر: بەوتەی سەرچاوەکە؛ "چوارچێوەی هەماهەنگی سەرۆکی داهاتووی حکومەت دیاریی دەکات، پێشبینیش دەکرێت لە هەفتەکانی داهاتوودا ناوی زیاتر لە کاندیدێک بخرێنەڕوو پێش ئەوەی ڕێککەوتن لەسەر ناوی کۆتایی بکرێت".