حووسییەكان: لە سەرەتایی جەنگی غەززەوە نزیكەی 100 كەشتییان كردووەتە ئامانج

ئاڤا نیوز

سەرۆکی حووسییەکانی یەمەن ڕایگەیاند، لە سەرەتای دەستپێکردنی جەنگی غەززەوە تاوەکو ئێستا لەلایەن چەکدارەکانیانەوە نزیکەی 100 کەشتیی کراونەتە ئامانج کە پەیوەندییان بە ئیسرائیلەوە هەبووە.

وێنە گەورەکە: حەوتی ئۆکتوبەری ساڵی ڕابردوو جەنگی غەززە لە نێوان حەماس و ئیسرائیل دەستیپێکردو تاوەکو ئێستاش بەردەوامە، حووسییەکانیش بەشێکی زۆری کەشتییەکانی دەریای سووریان بە ئامانج گرتووە و  دەڵێن سەر بە ئیسرائیلن. 

لێدوانی فەرمی: عەبدولمەلیک حووسی، سەرۆکی حووسییەکانی یەمەن ڕایگەیاند: تاوەکو ئێستا 98 کەشتیمان بە مووشەک و فڕۆکەی بێفڕۆکەوان لە دەریای سوور و کەنداوی عەدەن  کردووەتە ئامانج، کە سەر بە ئیسرائیل بوون و ئامانج لە هێرشەکانیش بەرگریکردن بووە لە غەززە. 

لە لایەکی دیکەوە: لە مانگی یەکی ئەمساڵەوە ئەمریکا هاوپەیمانییەکی پێکهێناوە بە ئامانجی پاراستنی کەشتییەکانی دەریای سوور و چەندین هێرشی بۆ سەر حوسییەکان لە یەمەن ئەنجامداوە، بەریتانیاش بەشداری زۆرێک لەو هێرشانە کردووە.

هۆکارە زانراوەکان: هەموو ئەو کارانەی حووسیەکان لە دەریای سوور دەیکەن، دەڵێن بۆ پشتیوانییە لەغەززە و دەبێت ئیسڕائیل بکشێتەوە.