وەزارەتی پەروەردە: هەر کەسێک ڕێکلام بۆ ئامێری گزی بکات دەستگیردەکرێت

ئاڤا نیوز

وەزارەتی پەروەردەی حكومەتی هەرێمی كوردستان دەستگیركردنی بەڕێوەبەرانی پەیجێكی لەسەر فرۆشتنی ئامێری گزیكردن ڕاگەیاند، هۆشداریش دەداتە ئەوانەی دەیانەوێت لە ڕێگەی سۆشیاڵ میدیاوە قوتابیان فریو بدەن و هەڕەشەی دەستگیركردنیان دەكات.

وێنە گەورەکە: لەگەڵ نزیکبوونەوەی تاقیکردنەوەکانی وزاری و نیشتیمانی، چەند کەسێک لەڕێگەی سۆشیال میدیاوە ڕێکلام بۆ فرۆشتنی ئامێری جۆراوجۆری گزیکردن دەکەن، لە بەرامبەر بڕێک پارە بە قوتابیانی دەفرۆشن، وەزارەتی پەروەردە لە ئێستاوە ئامادەكاری دەکات بۆ ڕێگریکردن لەو حاڵەتە.

ڕاگەیێنراوی فەرمی: "تیمی وەزارەتی پەروەردە لەگەڵ دامەزراوەکانی ئاسایش و پۆلیس ئامادەسازی دەکات، بۆ ئەوەی هەموو ئەو تۆمەتبارانەی لە ڕێگەی سۆشیال میدیاوە دەیانەوێت قوتابیان و خوێندکاران فریوبدەن ڕووبەڕووی یاسا بکاتەوە، تەنانەت دوای تەواوبوونی پڕۆسەی تاقیکردنەوەکانیش." وەزارەتی پەروەردە وادەڵێت.

زانیاریی زیاتر: لەسەر سکاڵای وەزارەتی پەروەردە، بەڕێوەبەرانی پەیجێک دەستگیرکراون کە لە پەیجەکەیدا ڕێکلامیان بۆ فرۆشتنی ئامێری گزی کردن کردووە.