بە كاتیۆشا هێرش كرایە سەر كێڵگەی غازی كۆرمۆر لە چەمچەماڵ

ئاڤا دیجیتاڵ

كێڵگەی غازی كۆرمۆر بە كاتیۆشا هێرشی كرایەسەر، سەرچاوەیەكیش بۆ ئاڤا میدیا باس لەوەدەكات هێرشەكە كۆگایەكی كردووەتە ئامانج و هیچ زیانێكی گیانی نەبووە.

چیرۆكی سەرەكی:  سەرچاوەیەك بۆ ئاڤا میدیا زانیاری لەبارەی هێرشكردنە سەر كێڵگەی غازی كۆرمۆر ئاشكرادەكات، سەرچاوەكە دەڵێت " كەمێك پێش ئێستا  هێرشكراوەتە سەر كێلگەی غازی كۆرمۆر لە قادر كەرەم،  عەمباری نەفتاكەی كۆرمۆر بەهۆی هێرشەكەوە ئاگری گرتووە".

بە گوتەی سەرچاوەكە " كاتیۆشایەك ئاڕاستەی كێڵگەی غازی كۆرمۆر كراوە و بەهۆیەوە ئاگر لە كۆگایەكی كێڵگەكە كەوتووەتەوە، سەرچاوەكە گوتیشی "هێرشەكە هیچ زیانێكی گیانی نەبووە".

ئێوارەی ڕۆژی دووشەممە 25-7-2022   كێڵگەی غازی كۆرمۆر لە سنووری شارۆكەی چەمچەماڵ، كەوتە بەر هێرشی مووشەكی و چەند كاتیۆشایەك بەر كێڵگەكە كەوتن، هێرشەكە لە دەوروبەری كاتژمێر 8:00ی ئێوارە روویداوە و بە سێ مووشەك هێرش كراوەتە سەر كێڵگەكە.

 

باكگراوند: ئەم كێڵگەیە پێداویستی رۆژانەی غازی ماڵان‌و وێستگەكانی كارەبای هەرێمی كوردستان دابین دەكات، لەپاڵ ئەمەدا نەوتی كۆندێنسەیت لەم كێڵگەیەدا بەرهەم دەهێنرێت.

ڕووبەری ئەم بلۆكە 135 كیلۆمەتری دووجایە، دەكەوێتە خۆرئاوای ناحیەی (قادركەرەم) لە قەزای چەمچەماڵ، ئەم كێلگەیە تاوەكو ساڵی 2003و رووخانی رژێمی سەددام لەژێر دەسەڵاتی حكومەتی عێراقدا بوو.

سەرەتای دۆزینەوەی ئەم كێڵگەیە دەگەرێتەوە بۆ ساڵی 1928، ئەوكات كۆمپانیای نەوتی ئینگلیز گەڕانێكی سەرەتایی تێدا كردووە‌و بیرێكی لێداوە، بەڵام نەوتی دەرنەهێناوە، ئیتر كاركردن لەم كێڵگەیە راوەستاوە تاوەكو ساڵی 1953 دەست بەكاركردن كراوەتەوە، ئەوكات پشكنەرەیان زیاتر بەدوای نەوتدا گەڕاون، بەڵام بۆیان دەركەوتووە (1.8 ترلیۆن) پێ سێجا گاز لە كێڵگەكەدا هەیە.