قوباد تاڵەبانی لەبارەی هێرشەکەی کۆرمۆر داوایەک لە عێراق دەکات

ئاڤا نیوز

 

قوباد تاڵەبانی جێگری سەرۆکوەزیرانی هەرێمی کوردستان، سەرکۆنەی هێرشەکەی ئێوارەی ئەمڕۆی سەر کێڵگەی کۆرمۆر لە چەمچەماڵ دەکات، داواش لە حکومەتی عێراق دەکات لەوبارەیەوە لێکۆڵینەوە بکات.

چیرۆکی سەرەکی: ئێوارەی ئەمڕۆ بە دیاریکراوی کاتژمێر 6:40 خولەک بەدرۆن هێرشکرایە سەر کێلگەی غازی کۆرمۆر، بەگوتەی قایمقامی چەمچەماڵ بەهۆی هێرشەکەوە سێ کەس کوژراون و سێ کەسی دیکەش برینداربوون.

لێدوانی فەرمی: قوباد تاڵەبانی جێگری سەرۆکوەزیرانی هەرێمی کوردستان ڕایگەیاند:" بە توندی ئەو هێرشە درۆنییەی کرایە سەر کێڵگەی گازی کۆرمۆر ئیدانە دەکەم و خەمبار بووم بەگیانلەدەستدان و برینداربوونی چەند کارمەندێک لەئاکامی هێرشەکەدا". 

زانیاریی زیاتر:" داوا لە حکومەتی عێراق و لایەنە پەیوەندیدارەکانی هەرێم دەکەم، دەستبەجێ لێکۆڵینەوەی ورد دەست پێ بکەن و ڕێکاری جددی  بگرنەبەر بۆ ڕێگریکردن لە دووبارەبوونەوەی ئەم جۆرە هێرشانە کەتیایدا هاوڵاتیانی مەدەنی دەبنە قوربانی  و خەڵکی کوردستان بەگشتی زیانمەندی سەرەکی دەبن". قوباد تاڵەبانی وای گوت.

وێنە گەورەکە: کێڵگەی غازی کۆرمۆر ڕۆژانە چوار هەزار و 200 مێگاوات کارەبا بەرهەم دەهێنێت، لەو بڕە دوو هەزار و 800 مێگاواتی بۆ هەرێمی کوردستان و ئەوەشی دەمێنێتەوە ڕەوانەی هەردوو پارێزگای کەرکووک و مووسڵ دەکرێت.