بەرەی تورکمانی: هەمان سیناریۆی دیالە لە کەرکووک دووبارە دەبێتەوە

ئاڤا نیوز

ئەندامێکی ئەنجوومەنی پارێزگای کەرکووک لە پشکی بەرەی تورکمانی پێی وایە، هەمان سیناریۆی دیالە لە کەرکووک دووبارە دەبێتەوە و لەلایەن ئەنجوومەنی دەوڵەتەوە پارێزگارێک دیاری دەکرێت.

وێنە گەورەکە: نزیکەی شەش مانگ بەسەر هەڵبژاردنی ئەنجوومەنی پارێزگاکان تێپەڕدەبێت کەرکووک تاکە پارێزگایە کە پارێزگاری نوێی دیاری نەکردووە، دوو کۆبوونەوەی لایەنەکان بەسەرپەرشتی سوودانی کراوە و هیچ ئەنجامێکیان نەبووە.

لێدوانی فەرمی: ئەحمەد ڕەمزی، ئەندامی ئەنجوومەنی پارێزگای کەرکووک بە ئاڤا نیوزی ڕاگەیاند:"دیارینەکردنی وادەی بەڕێوەچوونی سێیەم کۆبوونەوەی لایەنەکان لەگەڵ سوودانی دوای گەڕانەوەی لە واشنتن، ئاماژەیە بۆ ئەوەی هەمان سیناریۆی دیالە لە کەرکووک دووبارە ببێتەوە."

بۆچوونی لایەنی بەرامبەر: ئەحمەد کەرکووکی، ئەندامی ئەنجوومەنی پارێزگای کەرکووک بە ئاڤا نیوزی گوت: "بارودۆخی کەرکووک لەگەڵ دیالە جیاوازە، دۆخی کەرکووک بەمشێوەیە بەردەوام نابێت و بەم نزیکانە کۆبوونەوەی سێیەم دەکرێت."

ئەوەی پێویستە بیزانیت: ڕۆژی 24-04-2024، ئەنجوومەنی دەوڵەت بڕیاریدا، موسەنا تەمیمی وەک پارێزگاری دیالە لە پۆستەکەی دەمێنێتەوە، تا پارێزگاری نوێ دیاری دەکرێت و سوێندی یاسایی دەخوات.