نیاندەرتاڵەکانی ئەشکەوتی شانەدەر چییان خواردووە؟

ئاڤا نیوز

 

توێژەرانی بەریتانی لە لێکۆڵینەوەکانیاندا بۆیان دەرکەوتووە، کە نیاندەرتاڵەکانی ئەشکەوتی شانەدەر 75 هەزار ساڵ لەمەوبەر نیسک، نۆک، ماش و بەزالیا و قارچکیان بە بەهاراتەوە خواردووە. 

 

وێنە گەورەکە: مرۆڤی سەردەم و نیاندەرتاڵەکان، نزیکەی 700 هەزار ساڵ لەمەوبەر، یەک باوانی هاوبەشیان هەبووە، بەڵام بەپێی کات هەموو جۆرەکان لەناوچوون و تەنیا {هۆمۆ سایپیەن} مرۆڤی سەردەم ماونەتەوە، لە ساڵی 1957، Ralph Solecki لە ئەشکەوتی شانەدەر لە چیای برادۆست دەستی بە گەڕان کرد و زیاتر لە 10 ئێسکەپەیکەری دۆزیەوە. 

 

بۆچی گرنگە: دەستکەوتنی زانیاری سەبارەت بە نیاندەرتاڵەکان وادەکات لەبارەی ڕەچەڵەکی مرۆڤەوە زیاتر بزانین.

 

زانیاریی بەدەستهاتوو: زانایانی بەریتانی کوتلە خاکێک (ئەو خاکەی ڕەنگەکەی جیاوازترە لە چواردەورەکەی)ـی کاربۆنیزەکراویان لە ئەشکەوتی شانەدەر دۆزیەوە و دەستیان بە لێکۆڵینەوە کرد. 

 

لێدوانی فەرمی: عەبدولوەهاب سلێمان، بەڕێوەبەری شوێنەوای سۆران بە ئاڤا نیوزی ڕاگەیاند: بەپێی لێکۆڵینەوەیەکی زانکۆی کامبریجی بەریتانی لەبارەی ئەو کوتلە خاکە، نۆک، نیسک، ماش، بەزالیا و قارچک لەگەڵ بەهاراتی تێدا دۆزرایەوە، کە ئەو جۆرە بەهاراتەیان بەکارهێناوە، خواردنەکەی تفت کردووە.