چوار ڕۆژە ڕۆژنامەنووسێک لە سلێمانی دەستبەسەرە

ئاڤا نیوز

 

ماوەی چوار ڕۆژە ڕۆژنامەنووس شاکار ستار لە سلێمانی لەلایەن ئاسایشەوە دەستگیر کراوە و تاوەکو ئێستا ئازاد نەکراوە.

 

چیرۆکی سەرەکی: شەوی 18-05-2024، بێژەر و ڕۆژنامەنووس شاکار ستار کە لە دەزگایەکی میدیایی بەناوی "تیوار" کار دەکات، لەکاتی گەڕانەوەی لە سلێمانی بۆ هەولێر لە بازگەی ئاشتی کۆیە لەلایەن هێزێکی ئەمنییەوە دەستگیرکرا.

 

لێدوانی فەرمی: ئازاد حەمەدەمین، نەقیبی ڕۆژنامەنووسانی کوردستان بە ئاڤا نیوزی گوت: "دوێنێ بە هەوڵی ئێمە ڕێگەدراوە هاوژین و منداڵەکەی چاویان پێبکەوێت لە ئاسایشی سلێمانی".

 

لەلایەکی دیکەوە: دیاری محەممەد، بەڕێوەبەری سەنتەری میترۆ بە ئاڤا نیوزی ڕاگەیاند: "بڕیاربوو دادوەر ڕۆژنامەنووسەکە ببینێت، بەڵام نەیبینیوە و بەو هۆیەوە ئەمڕۆ ئازاد ناکرێت، دوایین جاریش کە بینیویانە دۆخی تەندروستی باش بووە و ئەشکەنجە نەدراوە".

 

زانیاریی بەدەستهاتوو: بە گوتەی سەرچاوەیەک لە دەزگای ئاسایشی هەرێمی کوردستان، دۆسیەکەی شاکار ستار، لەسەر کاری ڕۆژنامەوانییە و ئاسایشی سلێمانی سکاڵای لەسەر تۆمار کردووە، بە یاسای کاری ڕۆژنامەوانی دەستگیر نەکراوە.