سەرۆک بارزانی: باشترین ڕێگە بۆ چارەسەری گرفتەكان دیالۆگە

ئاڤا نیوز

سەرۆک بارزانی پێشوازی لە شاندێکی وەزارەتی دەرەوەی قەتەر کرد، بیروڕا لەبارەی بارودۆخی سیاسیی ناوچەکە و هەڕەشە و ئاڵنگارییەکانی بەردەم سەقامگیریی ناوچەکە ئاڵۆگۆڕ کرا.

ڕاگەیێنراوی فەرمی: لە سەڵاحەددین سەرۆک بارزانی پێشوازی لە شاندێکی وەزارەتی دەرەوەی قەتەر کرد کە پێکهاتبوون لە ئەحمەد بن حەسەن حمادی ئەمینداری گشتیی وەزارەتی دەرەوەی قەتەر و سوڵتان بن موبارەک کوبەیسی باڵیۆزی قەتەر لە عێراق و حوسێن بن علی ئەلفەزالە کونسوڵی گشتیی قەتەر لە هەولێر.

ئەوەی پێویستە بیزانیت: لە دیدارەکەدا بیروڕا لەبارەی بارودۆخی سیاسیی ناوچەکە و هەڕەشە و ئاڵنگارییەکانی بەردەم سەقامگیریی ناوچەکە ئاڵۆگۆڕ کرا، سەرۆک بارزانی ئاماژەی بەوەدا باشترین ڕێگە بۆ چارەسەرکردنی گرفت و بنبەست و ئاڵۆزییەکان گرتنەبەری شێوازی دیالۆگ و دوورکەوتنەوەیە لە شەڕ و کاولکاری.

زانیاریی زیاتر: لە دیدارەکەدا جەخت لە گەشەی پەیوەندییەکانی نێوان هەرێمی کوردستان و قەتەر لە بوارەکانی گەشتیاری و ئابووری و ئاوەدانی کرایەوە. 

وێنە گەورەکە: شاندێکی قەتەر لە هەرێمی کوردستانن و بڕیارە سبەی کونسوڵخانەی ئەو وڵاتە بە فەرمی لە هەولێر بکرێتەوە.