لێخۆشبوونی باج بۆ وەبەرهێنەرە قەتەری و كەنداوییەكان لە هەرێمی كوردستان دەكرێت

ئاڤا نیوز 

بەرپرسی ڕاگەیاندنی دەستەی وەبەرهێنانی هەرێمی کوردستان ڕایگەیاند، هەموو ئاسانکارییەک بۆ کۆمپانیا وەبەرهێنەرەکانی وڵاتانی کەنداو و بەتایبەت قەتەر لە هەرێمی کوردستان دەکرێت.

وێنە گەورەکە: ڕۆژی 26-5-2024 کونسوڵخانەی قەتەر لە هەرێمی کوردستان کرایەوە.

بۆچی گرنگە: قەتەر یەکێکە لە وڵاتە پێشکەوتووەکان لە بوار وەبەرهێنانی غاز و زۆربەی کەرتەکانی دیکە، دەتوانرێت ئەزموونی ئەو وڵاتە بۆ هەرێمی کوردستان بگوازرێتەوە.

لێدوانی فەرمی: بەرگەشت ئاکرێی، گوتەبێژی دەستەی وەبەرهێنان بە ئاڤا نیوزی گوت: بە فەرمانی سەرۆکوەزیران بارزانی 10 ساڵ لێخۆشبوونی باج بۆ کۆمپانیاکانی کەنداو بەتایبەت قەتەر دەکرێت، ئەگەر پێویستی بکات، دوای ئەو وادەیەش چەند ساڵێکی دیکە لێخۆشبوونەکەیان بۆ نوێ دەکرێتەوە.

لە لایەکی دیکەوە: بۆ پرۆژەکانی وەبەرهێنان پێویستیان بە هەر ئامراز و کەرەستەیەک لە دەرەوە هەبێت، لە کاتی هاوردەکردن لە خاڵە سنوورییەکاندا لێخۆشبوونی گومركییان بۆ دەکرێت، هاوکات پرۆژەکەش 100% دەکرێت بەناوی وەبەرهێنەکەوە.