ئاگری دارستانەکانی چیلی کۆنترۆڵ نەکراوە و ژمارەی قوربانییان لە بەرزبوونەوەدایە

ئاڤا دیجیتاڵ 

 

تاوەکو ئێستا ئاگری دارستانەکانی چیلی کۆنترۆڵ نەکراوە و ژمارەی ئەو کەسانەی کە بەهۆی ئاگرەکەوە گیانیان لەدەستداوە گەیشتە 51 کەس. 

 

وێنە گەورەکە: ماوەی چەند ڕۆژێکە ئاگر لە دارستانەکانی ناوچەی ڤالپاریسۆ لە چیلی کەوتووەتەوە، بەهۆی ئەو ئاگرەوە گیانلەدەستدانی زیاتر لە 51 کەس و برینداربوونی دەیانی دیکە بەفەرمی ڕاگەیێنراوە، چاوەڕێ دەکرێت ژمارەی قوربانییان بەرزتر ببێتەوە. 

 

لێدوانە فەرمییەکان: گابرێل بۆریچ، سەرۆکی چیلی دۆخی نائاسایی ڕاگەیاندووە و داوای کردووە "تەواوی سەرچاوە پێویستەکان" بۆ ڕووبەڕووبوونەوەی ئەم دۆخە بخرێنە بەردەست. 

لەلایەکی دیکەوە: وەزارەتی تەندروستیی چیلی لە ڕاگەیێنراو‌ێکدا دۆخی هۆشداریی لە ناوچەی ڤالپاریسۆی بۆ سوور بەرز کردووەتەوە." 

 

زانیاریی زیاتر: بەهۆی ئاگرەکەوە زیاتر لە هەزار خانوو بەتەواوی وێران بوون، ژمارەیەکی زۆر ئاژەڵ و پەلەوەر سووتاون، هەزاران کەس بەهۆی ئەو ئاگرەوە بێ ماڵ و حاڵ ماونەتەوە و ئاوارە بوون، هێشتا کۆنترۆڵی ئاگرەکە نەکراوە و حکومەت لە ئاسمان و زەوییەوە هەوڵی کۆنترۆڵکردنی دەدات. 

 

باکگراوند: هێشتا هۆکاری سەرەکیی کەوتنەوەی ئاگرەکە دیار نییە، بەڵام ئەمە سەختترین و تراژیدیترین ڕووداوی 14 ساڵی ڕابردووی چیلییە، دوای بوومەلەرزەکەی ساڵی 2010 کە نزیکەی 500 کەس گیانیان لەدەستدا.