کۆمسیۆنی هەڵبژاردنەکانی عێراق پێنج کورسیی کۆتاکانی پەسەند کرد

ئاڤا نیوز 

ئەنجوومەنی کۆمسیارانی کۆمسیۆنی هەڵبژاردنەکانی عێراق، پێنج کورسیی پێکهاتەکانی لە پەرلەمانی هەرێمی کوردستان پەسەند کرد.

ڕاگەیێنراوی فەرمی: ئەنجوومەنی کۆمسیارانی کۆمسیۆنی باڵای هەڵبژاردنەکانی عێراق، پێشنیازی ئەنجوومەنی دادوەریی عێراق بۆ دابین کردنی پێنج کورسی بۆ پێکهاتەکان لە پەرلەمانی هەرێمی کوردستان پەسەند کرد.

زانیاریی زیاتر: لە ڕۆژی 21ی ئەم مانگە ئەنجوومەنی دادوەریی عێراق بڕیاریدا لە کۆی 100 کورسیی پەرلەمانی هەرێمی کوردستان پێنجیان بۆ پێکهاتەکان تەرخان دەکرێت.

بڕیارەکە بەم شێوەیەیە: بەپێی بڕیاری ئەنجوومەنی کۆمسیارانی کۆمسیۆنی باڵای هەڵبژاردنەکان کورسی پێکهاتەکان بەمشێوەیە بەسەر پارێزگاکاندا دابەش کراوە:

کورسییەکی مەسیحی و کورسیەکی تورکمان بۆ هەولێر 
کورسیەکی مەسیحی و کورسیەکی تورکمان بۆ سلێمانی 
یەک کورسی ئەرمەنییەکان بۆ دهۆک.

ئەوەی پێویستە بیزانیت: لە مانگی شوباتی ئەمساڵ دادگەی باڵای فیدراڵی بڕیاری هەڵوەشاندنەوەی 11 کورسیی پێکهاتەکانی لە پەرلەمانی کوردستان دا، ئەمەش ناڕەزایەتیی پێکهاتەکان و بەشێکی زۆری پارتەکانی بەدوای خۆیدا هێنا.