هێرشەکانی ئەمریکا لایەنە سیاسییە ناکۆکەکانی عێراق یەکدەخات

ئاڤا دیجیتاڵ

 

هێرشەکەی ئەمریکا بۆ سەر گرووپە چەکدارەکانی عێراق، کوژران و برینداربوونی دەیان چەکدار، لایەنە سیاسییە ناکۆکەکانی عێراق یەکدەخات و دەڵێن، پێشێلکردنی سەروەریی خاکی عێراقە و جەخت لە چوونەدەرەوەی بەپەلەی هێزە بیانییەکان دەکەنەوە.

 

وێنە گەورەکە: لەدوای ساڵی 2020 و کوشتنی قاسم سولەیمانی و ئەبو مەهدی موهەندیس، یەکەمجارە بەمشێوازەی ئێستا هێرشەکانی ئەمریکا بۆ سەر گرووپە چەکدارەکانی عێراق کاردانەوەیەکی لەم شێوەیەی لێدەکەوێتەوە کە تەواوی لایەنە سیاسییە جیاوازەکان یەکدەنگ دەکات.

 

لێدوانی فەرمی: لە سەرۆککۆمارەوە بۆ سەرکردەی لایەنە سیاسییەکانی عێراق و گرووپە چەکدارەکان بەمشێوازە باسیان لە هێرشەکان کرد:

 

لەتیف ڕەشید، سەرۆککۆماری عێراق: ھێرشەکەی ئەمریکا پێشێلکاریی سەروەریی عێراقە و کاریگەریی لەسەر ئاسایش و سەقامگیری ناوچەکە دەبێت.
•    هێرشەکەی ئەمریکا دەبێتە هۆی تێکدانی دەرفەتی سەرکەوتنی دانوستانەکان لەگەڵ هاوپەیمانان.

 

محەممەد شیاع سوودانی، سەرۆکوەزیرانی عێراق: بۆ گیانی قوربانییەکانی هێرشەکە سێ ڕۆژ ماتەمینی گشتی دەبێت لە عێراق.
•    حکومەتی عێراق ڕەتیدەکاتەوە هەماهەنگیی پێشوەختە بۆ هێرشەکانی ئەمریکا کرابێت و دەڵێت، ئەوە بانگەشەیەکی "درۆیە" بە ئامانجی چەواشەکردنی ڕای گشتی.
•    هاوپەیمانیی نێودەوڵەتی لەو ئەرکانەی پێی سپێردراوە لایداوە، بووەتە هۆکارێک بۆ هەڕەشەکردن لە ئاسایش و سەقامگیریی عێراق.

 

ئەنجوومەنی نوێنەرانی عێراق: لیژنەی ئاسایش و بەرگری بە ھەماھەنگی لەگەڵ دەزگا ئەمنییە پەیوەندیدارەکان لیژنەیەکی لەسەر ھێرشەکان پێکھێناوە.
•    ئەنجوومەنی نوێنەران کۆبوونەوەیەکی تایبەت بەو بابەتە دەکات بۆ ڕێگریکردن لە دووبارەھێرشکردنەوەی سەر عێراق و دانانی سنوورێک بۆ ھێزەکانی ھاوپەیمانان کە سەروەریی عێراق پێشێل نەکەن.

 

وەزارەتی دەرەوەی عێراق: وەک ناڕەزایەتییەک بەرامبەر دەستدرێژیی ئەمریکا بانگهێشتی بەرپرسی کاروباری باڵیۆزخانەی ئەمریکا لە بەغدا دەکەین.

 

نووری مالیکی، سەرۆکی هاوپەیمانیی دەوڵەتی یاسا: دەستدرێژیی ئەمریکا بۆ سەر سەروەریی عێراق، زۆر دووبارە بووەتەوە و سەرکۆنەی دەکەین.
•    یاسا نێودەوڵەتییەکان و بەندەکانی مافی مرۆڤ و بەهاکانی شارستانییەت بانگەشەیەکی "درۆیین".
•    دەبێت هەڵوێستێکی نیشتمانی بەرپرسیارانە لە هەموولایەک هەبێت کە سەروەری وڵات و گیانی گەل بپارێزێت.

 

هادی عامری، سەرۆکی هاوپەیمانیی فەتح: کاتی هاتووە هێزەکانی ئەمریکا و بیانییەکان دەربکرێن و ڕێگەیان پێنەدرێت یەک ڕۆژی دیکە لە خاکی عێراق بمێننەوە.
•    وەشاندنی گورز، پرۆسەی دەستپێکی گەڕاندنەوەی "تیرۆری داعشە و بەدڵنیاییەوە ئەمریکا گەورەترین پشتیوانی داعشە."
•    پێویستە لەسەر ئەنجوومەنی نوێنەران بڕیاری دەرکردنی هێزە بیانییەکان بدات و مانەوەی ئەو هێزانە ناپاکییە لە گەلی عێراقی.

 

هومام حەموودی، سەرۆکی ئەنجوومەنی باڵای ئیسلامی عێراق: بەردەوامی پێشێلکارییە ئاشکراکانی هێزەکانی ئەمریکا بۆ سەر سەروەری نیشتمانی عێراق، هەڵکشانێکی مەترسیدارە کە نابێت تەنیا لە سەرکۆنەکردندا سنووردار بکرێت.

 

عەممار حەکیم، سەرۆکی ڕەوتی حیکمەی نیشتمانی: سەرکۆنەی هێرشی ئەمریکا بۆ سەر ژمارەیەک بارەگا لەسەر سنووری عێراق و سووریا دەکەین.

 

هاوپەیمانیی نەسر: جەخت لەسەر پێویستی کۆتاییهێنان بە هەموو پاساوێکی نێوخۆیی و دەرەکی دەکەینەوە کە وڵات ڕووبەڕووی مەترسی دەکەنەوە.

 

 دەستەی حەشدی شەعبی: هێرشەکانی ئەمریکا پێشێلکردنی ئاشکرای سەروەریی عێراقە و هێرشکردنە بۆ سەر خزمەتگوزارییە ئەمنییە فەرمییەکانی.

 

ئەبو ئالا وەلائی، سەرۆکی گرووپی چەکداری سەید شوھەدا: مقاوەمەی ئیسلامی دەتوانێت وەڵام بداتەوە و تاوەکو ئێستاش ئامادەن بۆ ئەوەی چالاکیی زیاتر ئەنجام بدەن.
•    ھۆشداری دەداتە کوێت و سعوودیە و ئوردن کە ڕێگەیان بە ئەمریکا داوە لە خاکی وڵاتەکانیانەوە هێرشبکەنە سەر عێراق.

 

ئەکرەم کەعبی، ئەمینداری گشتیی بزووتنەوەی نوجەبا: بەردەوام دەبین لە ‌ھێرشەکان بۆ سەر ھێزەکانی ئەمریکا و ھیوادارین حزبوڵڵاش دەست بە ھێرشەکانیان بکەنەوە.
•    ھێرشەکان بەردەوام دەبن تاوەکو دوو ئامانج بەدی نەیەت، یەکەمیان کشانەوەی ئەمریکا و دووەمیان ڕاگرتنی ھێرشەکانی ئیسرائیلە بۆ سەر کەرتی غەزە.

 

ئەوەی پێشبینی دەکرێت: چاوەڕوان دەکرێت دوای هێرشەکەی ئەمریکا و ئەم توڕەییەی سەرکردە سیاسییەکانی عێراق، ئاستەنگ بۆ دانوستانەکانی کۆتاییهێنان بە ئەرکی هێزەکانی هاوپەیمانیی نێودەوڵەتیی دژی داعش و کشانەوەیان دروست ببێت، بەتایبەت کە گرووپە چەکدارەکان هەڕەشەی دووبارە دەستپێکردنەوەی هێرشەکانیان دەکەنەوە، بەرپرسانی واشنتینش دەڵێن، بێ وەڵام نابن لە هیچ هێرشێک.

 

باکگراوند: شەوی 02-02-2024، سوپای ئەمریکا 85 بنکە و بارەگا و کۆگای چەک و تەقەمەنی گرووپە چەکدارەکانی نزیکی ئێرانی لە عێراق و سووریا کردە ئامانج، بەهۆیەوە تەنیا لەعێراق 16 کەس کوژران و  25 کەسیش برینداربوون.