سەرۆکوەزیران بارزانی داواکارییەکی جووتیارانی ئاکرێ جێبەجێ دەکات

ئاڤا نیوز

 

سەرۆکوەزیران بارزانی، بەردی بناغەی دووەم گەورەترین عەلوە لەسەر ئاستی هەرێمی کوردستان و عێراق لە ئاکرێ دانا، بۆ پاڵپشتی جووتیارانیش داواکارییەکیان جێبەجێ دەکات.

 

چیرۆکی سەرەکی: ئەمڕۆ سێشەممە 11-06-2024 سەرۆکوەزیران بارزانی بەر لە دانانی بەردی بناغەی پڕۆژەی عەلوەی ئاکرێ، سەردانی کێڵگەی چاندنی  پەتاتە دەکات، چاوی بە چەند جووتیارێک دەکەوێت و داوای لێدەکەن ڕێگری لە هاوردەکردنی پەتاتە لە دەروازە سنوورییەکان بکات.

 

لێدوانی فەرمی: سەرۆكوەزیران بارزانی لە کاتی پێشکەشکردنی گوتارەکەی گوتی:"وەزارەتەکانی کشتوکاڵ و دارایی بەدواداچوون لەسەر ئەو بابەتە دەکەن بۆ ئەوەی ڕێگری لە بەرهەمی هاوردە بکرێت بۆ ساغبوونەوەی بەرهەمی نێوخۆیی جووتیاران، ئەگەر دەرکەوت پڕۆسەی هاوردەکردنەکە بە ناساییە، ئەوا ڕێکاری یاسایی بەرامبەر بکەرانی دەگیرێتەبەر".

 

گۆشەیەکی دیکەی دیمەنەکە: بەرهەمی پەتاتە لە پێویستی نێوخۆیی زیاترە و بەشی هەموو عێراق دەکات هەروەها شێوازەکەی بە زانستی کراوە کە ئەمەش کاریگەری کردووەتە سەر کوالێتی بەرهەمەکە و حکومەتی هەرێمی کوردستان هەنگاوی کردەیی بۆ هەناردەکردنی بەرهەمەکە بۆ دەرەوەی وڵات ناوە. سەرۆکوەزیران بارزانی وای گوت.