لە هێرشێکی چەکداریدا لە پاکستان 10 پۆلیس کوژران

ئاڤا دیجیتاڵ

لە هێرشێکی چەکداریدا بۆ سەر بنکەیەکی پۆلیس لە باکووری رۆژئاوای پاکستان، بەلایەنی کەمەوە 10 پۆلیس کوژران و چواری دیکەش بریندار بوون. 

وێنە گەورەکە: هێرشەکە لەکاتێکدایە  8ی ئەم مانگە هەڵبژاردنی گشتی لەو وڵاتە بەڕێوەدەچێت. هاوکات لە ڕۆژانی ڕابردووشدا دەیان هێرشی جۆراوجۆری دیکە کراونەتە سەر بەربژێر و پارتە سیاسییەکانی ئەو وڵاتە.

لێدوانی فەرمی: ئەختەر حەیات گەنداپور، بەرپرسی پۆلیسی ویلایەتی خەیبەر پەختونخوا ڕایگەیاندووە، بەرەبەیانی ڕۆژی دووشەممە زیاتر لە 30 "چەکداری تیرۆریست" لە سێ لاوە هێرشەکەیان بۆ سەر بنکەی پۆلیسی چودوان لە شاری دیرە ئیسماعیل خان کردووە، توانیویانە بۆ ماوەیەک بنکەکە کۆنترۆڵ بکەن و پێکدادان بۆ ماوەی دوو کاتژمێر و نیو بەردەوام بووە. 


زانیاریی زیاتر: تاوەکو ئێستا هیچ کەس و لایەنێک بەرپرسیارێتیی خۆی لە ئەنجامدانی هێرشەکە ڕانەگەیاندووە. 

باکگراوەند: ناوچە سنوورییەکانی ویلایەتی خەیبەر پەختونخوا بۆ ماوەی چەندین ساڵ پێگەی چەکدارانی تاڵیبانی پاکستان و داعش بووە.