پارتی و یەكێتی لە مەخموور سازش بۆ یەكتر ناكەن

ئاڤا نیوز

بڕیارە لە چەند ڕۆژی داهاتوودا بەشێکی دیکەی پۆستە کارگێڕییەکانی پارێزگای نەینەوا دابەش بکرێن، ئەوەش لەکاتێکدایە پارتی دیموکراتی کوردستان و یەکێتیی نیشتیمانی کوردستان لەسەر پۆستێک ناکۆکن.

وێنە گەورەکە: پێنج مانگ بەسەر  هەڵبژاردنی پارێزگار، جێگرەکەی، سەرۆکی ئەنجوومەن و  دوو جێگرەکەی تێپەڕ دەبێت، تاوەکو ئێستا پۆستە کارگێڕییەکانی دیکە یەکلایی نەکراونەتەوە، پارتی و یەکێتیش سوورن لەسەر وەرگرتنی پۆستی قایمقامی مەخموور.

لێدوانی فەرمی: ئەحمەد کیکی، ئەندامی ئەنجوومەنی پارێزگای نەینەوا لە پشکی پارتی بە ئاڤا نیوزی گوت: "کار لەسەر ئەوە دەکەین، شایستەیی خۆمان کە پێشووتر هەمانبووە وەریبگرینەوە، قایمقامی مەخموور مافی خۆمانە سازشی لەسەر ناکەین".

بۆچوونی بەرامبەر: غەیاس سوورچی، بەرپرسی ڕاگەیاندنی مەڵبەندی یەکێتیی لە نەینەوا بۆ ئاڤا نیوز گوتی: "داوای شەش پۆستمان کردووە، دوو قایمقام یەکێکیان مەخموور بێت، دوو بەڕێوەبەری ناحیە (وانکێ و سنوونێ) لەگەڵ دوو بەڕێوەبەری گشتیی ئەوانیش (سەرۆکایەتی شارەوانی نەینەوا و شارەوانی دەوروبەری  نەینەوا).

ئەوەی پێویستە بیزانیت: لە هەڵبژاردنی ئەنجوومەنی پارێزگاکانی عێراق، پارتی توانی چوار کورسی نەینەوا بەدەستبهێنێت، بەوەش بووە هێزی دووەمی پارێزگاکە و  یەکێتییش دوو کورسی هەیە.