شارەوانیی هەولێر: تیمێکمان بۆ بنبڕکردنی گژوگیا پێکهێناوە

ئاڤا نیوز

 

سەرۆکی شارەوانیی هەولێر ڕایگەیاند، گژوگیای ئەمساڵ هۆکاری زۆرینەی ئاگرکەوتنەوەکان بووە، بۆیە تیمێک بۆ بنبڕکردنیان دروستکراوە.

 

لێدوانی فەرمی: کارزان هادی، سەرۆکی شارەوانیی هەولێر بە ئاڤا نیوزی گوت: تیمێک لە نۆ شارەوانییەکە و بەڕێوەبەرایەتیی پارک و باخچەکان و پارکی سامی عەبدولڕەحمان پێکهێنراوە، بۆ ئەوەی گژوگیاکان بنبڕ بکەن".

 

ئەمەش بزانە: ئەو تیمە ڕۆژانە 15 کاتژمێر کار دەکات و  توانیویانە 90%ـی گژوگیای ئەو شوێنانە لابەرن و هەفتەی داهاتوو ئەوەی ماوە تەواوی دەکەن.

 

لە لایەکی دیکەوە: شارەوانی هەولێڕ ئاماژەی بەوەش کردووە، کارگە و کۆمپانیا، پاڵاوگەکان و شوێنە تایبەتییەکان، دەبێت خۆیان ئەو گژوگیایەی دەوروبەریان لاببەن.

 

زانیاریی بەدەستهاتوو: تیمێک لە بەرگریی شارستانی و سەرۆکایەتیی شارەوانیی هەولێر پێکهێنراوە، تاوەکو چاودێریی بینا و باڵەخانە و شوێنە گشتییەکان بکەن و لە بوونی سیستەمی ئاگرکوژێنەوە دڵنیاببنەوە.