سەرۆكی ژووری بازرگانیی سلێمانی: ئاڵوگۆڕی بازرگانیمان لەگەڵ ئێران لە ئاستێكی زۆر باشدایە

ئاڤا نیوز

سەرۆكی ژووری بازرگانیی سلێمانی دەڵێت، ئاڵوگۆڕی بازرگانیی نێوان پارێزگای سلێمانی و ئێران لە ئاستێكی زۆر باشدایە و لە سەرجەم خاڵە سنوورییەكانەوە بازرگانیی ڕێگەپێدراو دەكرێت.

وێنە گەورەکە: بۆ بەهێزكردنی پەیوەندییە ئابوورییەكان لەنێوان هەرێمی كوردستان و كۆماری ئیسلامی ئێراندا، شاندێكی باڵای وەزارەتی دەرەوەی ئێران لە هەرێمی كوردستانن و سەردانی هەولێر و سلێمانییان كرد.

بۆچی گرنگە: ئێران یەكێكە لەو وڵاتانەی كە لەگەڵ هەرێمی كوردستان پەیوەندییەكی بەهێزی بازرگانی هەیە و ساڵانە شەش ملیار دۆلار ئاڵوگۆڕی بازرگانی لە نێوانیاندایە.

لێدوانی فەرمی: نەوزاد غەفوور، سەرۆكی ژووری بازرگانیی سلێمانی بۆ ئاڤا نیوز گوتی: ئاڵوگۆڕی بازرگانی و ئابووریی بەهێز لەنێوان هەرێمی كوردستان و ئێراندا هەیە و لە سلێمانیش لەسەرجەم خاڵە سنوورییەكانەوە بازرگانی لەگەڵ كۆماری ئیسلامی ئێران دەكرێت.

باکگراوند: هەرێمی کوردستان لەگەڵ ئێران، 650 کیلۆمەتر سنووری وشکانی هەیە و حەوت دەروازەی سنووریش لە نێوانیاندایە.