پارێزگاری بە وەکالەتی کەرکووک بەرتیل بە دەستەی دەستپاکی عێراق دەدات

ئاڤا نیوز 

پەرلەمانتارێکی عێراق، پارێزگاری بە وەکالەتی کەرکووک تۆمەتبار دەکات بەوەی ژمارەیەک ئۆتۆمبێلی بە لقی کەرکووکی دەستەی دەستپاکی عێراق داوە، لە پێناو چاوپۆشی لە دۆسیەی گەندەڵییەکانی پارێزگار.

وێنە گەورەکە: دیلان غەفور، پەرلەمانتاری عێراق سەر بە پارێزگای کەرکووک، ڕاکان جبوری پارێزگاری بە وەکالەتی کەرکووک تۆماتبار دەکات بە پێدانی نۆ ئۆتۆمبێل بە لقی کەرکووکی دەستەی دەستپاکی عێراق لەبەرامبەر چاوپۆشی کردن لە گەندەڵییەکانی پارێزگار.

لێدوانی فەرمی: دیلان غەفور، پەرلەمانتاری عێراق بە ئاڤا نیوزی گوت: "سەرۆکی دەستەی دەستپاکی ڕەتیکردووەتەوە ئەوان ئەو ئۆتۆمبێلانەیان لە پارێزگاری بەوەکالەتی کەرکووک وەرگرتبێت و لەم پێناوەش بەدواداچوون بۆ ئەو کەیسە دەکەن".

ئەوەی پێویستە بیزانیت: "ئەو نۆ ئۆتۆمبێلە لە جۆری تۆیۆتان و بۆ ئەندازیارانی سەر بە پارێزگای کەرکووک تەرخان کراون، بەڵام ئێستا لە گەراجی ئۆتۆمبێلەکانی دەستەکە ڕاگیراون". دیلان غەفور ئەوەشی گوت.