خۆراک و کەرەستەی ماوەبەسەرچوو بەسەر ئاوارەکانی شنگال دابەشدەکرێت

ئاڤا دیجیتاڵ

لە کەمپی شێخان کە تایبەتە بە ئاوارەکانی شنگال، خۆراک و کەرەستەی ماوەبەسەرچوو لەلایەن وەزارەتی کۆچ و کۆچبەرانی حکومەتی عێراق بەسەر ئاوارەکان دابەشکراوە، لە کەمپەکانی زاخۆش بە هەمان هۆکار خۆراک و پێداویستییەکان گەڕێنراونەتەوە. 

بەشێک لە خۆراک و کەرەستەکان بریتین لە: برنج، فاسۆلیا، سابوون و پێداویستییەکانی پاککردنەوە. یەکێک لە دانیشتووانی کەمپەکە کە لەم ڕاپۆرتەدا قسەی بۆ ئاڤا میدیا کردووە، دەڵێت حکومەتی عێراق کەرەستەی پیس بۆ ئێمە دەنێرێت و ئێمە سوودیان لێنابینین.

پیر دەیان، بەڕێوەبەری کۆچ و کۆچبەرانی پارێزگای دهۆک بە ئاڤا میدیای ڕاگەیاند، ئەو خۆراک و کەرەستانەی لەلایەن حکومەتی عێراقەوە دابین دەکرێت کواڵیتییان زۆر خراپە و بەکەڵکی بەکارهێنان نایەن.

ناوبراو هۆکارەکە بۆ کێشەی سیاسی دەگەڕێنێتەوە و دەڵێت: "ڕەیان کلدانی، سەرۆکی بزووتنەوەی بابلیۆن (کە کریستیانە و خەڵکی نەینەوایە) خاوەنی وەزارەتی کۆچ و کۆچبەرانە، دەیەوێت تۆڵە لە ئاوارەکانمان بکاتەوە بۆیە ئەم کێشانەیان بۆ دروست دەکات".