پشتیوان سادق: 29 لەو حاجییانەی گیانیان لەدەستداوە بە ڤیزای گەشتیاریی چوونەتە سعودیە

ئاڤا نیوز

 

وەزیری ئەوقافی حکومەتی هەرێمی کوردستان ڕایگەیاند، لە کۆی 30 حاجیی هەرێمی کوردستان کە گیانیان لەدەستداوە 29 لەوان بە ڤیزای گەشتیاریی چوونەتە سعودیە.

 

چیرۆکە سەرەکی: ئەمساڵ بۆ بەجێهێنانی فەریزەی حەج، لە ڕێگەی وەزارەتی ئەوقافەوە چوار هەزار و 685 هاونیشتمانیی هەرێمی کوردستان گەشتی وڵاتی سعودیەیان کردبوو، ئەمە جیا لەو 15 هەزار هاونیشتمانییەی لە ڕێگەی "ڤیزای یەک ساڵی"ـیەوە (گەشتیاری) گەشتیان کردووە.

 

لێدوانی فەرمی: پشتیوان سادق، وەزیری ئەوقاف، ڕایگەیاند: چوار هەزار و 685 کەس لە ڕێگەی ئێمەوە چوونەتە حەج، ئەو 42 فەرمانبەرەی بۆ خزمەتی حاجیان دانرابوو، جگە لە کاری خۆیان لەو ڕووداوەکاندا بەهانای ئەو حاجیانەشەوە چوون کە بە ڤیزەی گەشتیاری لە مەککە بوون.

 

لە لایەکی دیکەوە: وەزیری ئەوقاف گوتی: لێکۆڵینەوە لەگەڵ ئەو کۆمپانیایانە دەکرێ کە لە ئاست خزمەتکردنی حاجییان کەمتەرخەم بوون.

 

زانیاری زیاتر: ئەمڕۆ دووشەممە 428 حاجی لەڕێگەی فڕۆکەخانەی هەولێرەوە گەیشتنەوە هەرێمی کوردستان.

 

ئەمەش بزانە: ئەمساڵ لە هەرێمی کوردستان لە 27 لەسەر 28ـی ئایار یەکەم گەشتی وشکانی و لە 29ـی ئایار یەکەم گەشتی ئاسمانی بۆ حەج کرا.