چوار قاچاخچی لەسەر ژێرئاوکەوتنی یەختەکەی ئیتاڵیا دەستگیرکران

ئاڤا نیوز

 

دەزگای ئاسایشی هەرێم ڕایدەگەیێنێت، ئەوانەی پەیوەندییان بە ژێرئاوکەوتنی ئەو یەختە هەبوو کە هەفتەی ڕابردوو لە ئیتاڵیا ژێرئاو کەوت، دەستگیرکران.

 

وێنە گەورەکە: ڕۆژی 17ـی ئەم مانگە بەلەمێکی کۆچبەران لە کەناراوەکانی ئیتاڵیا نقوم بوو، زیاتر لە 60 کۆچبەری هەڵگرتبوو و زیاتر لە 40 یان کوردی باشوور و ڕۆژهەڵاتی کوردستان بوون، زۆربەشیان گیانیان لەدەست دا.

 

ڕاگەیێنراوی فەرمی: ئەمڕۆ سێشەممە دەزگای ئاسایشی هەرێم دەستگیرکردنی چوار تۆمەتباری قاچاخچی بە ناوەکانی (ح،ح،ع )،(ب،س،م)،( م،ج،أ )،( د،ع،س ) ڕاگەیاند؛ بەرپرسی سەرەکیی ناردنی ئەو هاوڵاتییانە بوون کە هەفتەی پێشوو لە ڕووداوی ژێرئاوکەوتنی یەختێک کە بووە بەهۆی گیانلەدەستدانی  64 کەس لە کەناراوەکانی کالابریای ئیتاڵیا.

 

ئەوەی پێویستە  بیزانیت: بە فەرمانی سەرۆکوەزیران بارزانی ژوورێکی ئۆپەراسیۆن لەلایەن وەزارەتی ناوخۆ و فەرمانگەی پەیوەندییەکانی دەرەوەی ڕپێکهێنراوە، بۆ ئەوەی هەوڵ بۆ دۆزینەوەی چارەنووسی بێسەروشوێنان بدەن، هەموو هاوکاری و کارئاسانییەکیش بۆ ڕزگاربووان و بۆ گەڕاندنەوەی تەرمی قوربانییەکان پێشکەش بکەن.