دەم پارتی: هاوژینی دەمیرتاش بەربژێر ناکەین

ئاڤا دیجتیاڵ

 

هەڵبژاردنی شارەوانییەکانی تورکیا لە 31ـی ئاداری ئەمساڵ بەڕێوەدەچێت؛ بڕیاربوو باشاک دەمیرتاش ببێتە بەربژێری دەم پارتی بۆ پۆستی گەورەشارەوانیی ئیستەنبووڵ، بەڵام پارتەکە بەربژێرکردنی باشاکی ڕەتکردەوە. 

 

وێنە گەورەکە: دوای ئەوەی پارتی یەکسانی و دیموکراسیی گەلان (دەم پارتی) ڕایگەیاند، بەربژێریان بۆ سەرۆکایەتیی گەورەشارەوانیی ئیستەنبووڵ دەبێت، باشاک دەمیرتاش، هاوژینی سەڵاحەدین دەمیرتاش، سەرۆکی پێشووی هەدەپە خواستی خۆی بۆ ئەو پۆستە راگەیاند. دەم پارتی لەگەڵی باشاک کۆبووەوە و بە ڕێککەوتنی هەردوولا بڕیاردرا، خۆی بۆ ئەو پۆستە بەربژێر نەکات.

 

لێدوانی فەرمی: دوای ڕاگەیێنراوەکە باشاک دەمیرتاش گوتی: "بۆ پشتگیریکردنی سیاسەتی هەڵبژاردنی ناوخۆیی پارتەکەمان، ئامادەیی خۆم بۆ بەرپرسیارێتیی کاندیدکردنی سەرۆکایەتیی گەورەشارەوانیی ئیستەنبووڵ دەربڕی، بەڵام بریاری کۆتایی لەلایەن کارگێریی پارتەکەمانەوە دەدرێت و ڕێزی لێدەگرم".

 

گوتیشی: "پێویستە هەمووان بیزانن، بڕیارەکان بە هەماهەنگی لەگەڵ پارتەکەمان دراوە. جگە لەو راگەیێنراوەی کە پارتەکەمان بڵاویکردووەتەوە، هیچ لێدوانێکی دیکە نادەم".

 

زانیاریی زیاتر: بڕیارە 31ـی ئاداری ئەمساڵ، هەڵبژاردنی شارەوانییەکانی تورکیا بەڕێوەبچێت و لە دوایین هەڵبژاردنی شارەوانییەکانیشدا، هەدەپە 'کە ئێستا بووەتە دەم پارتی' سێ گەورەشارەوانی بەدەستهێنا.