پارتی فراکسیۆنەکەی لە ئەنجوومەنی پارێزگای نەینەوا هەڵپەسارد

ئاڤا نیوز

 

فراکسیۆنی پارتی دیموکراتی کوردستان هەڵپەساندنى ئەندامێتی لە ئەنجوومەنی پارێزگای نەینەوا ڕاگەیاند.

 

لێدوانی فەرمی: ئەحمەد کیکی، ئەندامی فراکسیۆنی پارتی له‌ ئەنجوومەنی پارێزگای نەینەوا ڕایگەیاند: بەهۆی ئەو کارە نایاساییانەی ئەنجوومەنی پارێزگای نه‌ینه‌وا پەیڕەوی كرد له‌ دانیشتنی ئه‌مڕۆدا، پارتی دیموکراتی کوردستان ئەندامیێتیی فراکسیۆنەکەی لە ئەنجوومەنی پارێزگاكه‌ هەڵپەسارد.

 

لەلایەکی دیکەوە: سەنگەر کانەبی، بەرپرسی لقی 23ـی قەرەچوغ ڕایگەیاند: ئەوانەی پێیانوایە لە دەرەوەی یاسا و ماددە دەستوورییەکانی عێراق دەتوانن ئیرادەیان بەسەر مەخموورییەکان بسەپێنن، خەیاڵیان خاوە، هیچ هێزێک ناتوانێت بڕیاری نایاسایی و نادەستووری جێبەجێ بکات، قایمقام و بەڕێوەبەری ناحییەکان لە کاری خۆیان بەردەوام دەبن.

 

زانیاریی زیاتر: ئەحمەد کیکی ئاماژەی بەوەش کردووە، ئه‌نجوومه‌نی پارێزگای نه‌ینه‌وا برگه‌كانی تایبه‌ت به‌ ناوچە کوردستانییەکانی دەرەوەی ئیدارەی هەرێمی کوردستان به‌پێی مادده‌ی 140 پێشێل کرد.

 

ئه‌مه‌ش بزانه‌: ئەنجوومەنی پارێزگای نەینەوا بەبێ فراکسیۆنی پارتی کۆبووەوە و گۆڕانکاری لە 14 پۆستی کارگێڕی لە پارێزگای نەینەوا کرد.