رەئیسی: ئەمریكا سەقامگیری رۆژهەڵاتی ناوەڕاست تێكدەدات

ئاڤا دیجیتاڵ

ئیبراهیم رەئیسی سەرۆككۆماری ئێران، پێیوایە ئەمریكا بە جێگیركردنی هێزەكانی لە رۆژهەڵاتی ناوەڕاست سەقامگیری ناوچەكە تێكدەدات.

بۆچی گرنگە: لەكاتێكدا وەزیری دەرەوەی ئەمریكا لە گەشتێكی دییبلۆماسیدایە بۆ وڵاتانی رۆژهەڵاتی ناوەڕاست، رەئیسی ئەمریكا بە هۆكاری تێكدانی سەقامگیریی ناوچەکە ناودەبات.

سەرۆككۆماری ئێران پێشووتریش هۆكاری هێرشەكانی ئەمریكای بۆ سەر وڵاتانی رۆژهەڵات بەوە ناوبرد كە " ئەمریكا فۆبیای بە ئێران و ئیسلامییەكان" هەیە.

لێدوانی فەرمی: جێگیركردنی هێزەكانی ئەمریكا لە عێراق و سووریا و ئەفغانستان، هۆكارێكە بۆ تێكچوونی سەقامگیری ناوچەكە و هیچ پاساوێك نییە بۆ مانەوەی ئەو هێزانە، ئیبراهیم رەئیسی وای گوت.

هۆكارە زانراوەكان: ئەو قسانەی رەئیسی لەكاتێكدایە، ئەنتۆنی بلینكن، وەزیری دەرەوەی ئەمریكا ماوەی چەند رۆژێكە گەشتێكی بە نێو وڵاتانی رۆژهەڵاتی ناوەڕاستدا دەستپێكردووە  بۆ ئەوەی" ئاگربەستی غەزە" لە نێوان ئیسرائیل و حەماس بگەیەنێتە ئەنجام.

باكگراوند: تاران و واشنتن لە ساڵی 1980ەوە تا ئێستا هیچ پەیوەندییەكی دیپلۆماسی فەرمییان نەبووە، ئەمەش دوای شۆڕشی ئیسلامیی ساڵی 1979 و هێرشكردنە سەر باڵیۆزخانەی ئەمریكا لە تاران.