ئەمڕۆ لە کوشتارگەی سلێمانی هیچ ئاژەڵێک سەرنەبڕاوە

ئاڤا نیوز

پشکنینی ئاژەڵان لە کوشتارگەی  سلێمانی بە  کۆمپانیایەک دەسپێردرێت، ئەمەش ناڕەزایەتی لێدەکەوێتەوە و گۆشتفرۆشان ماندەگرن.

چیرکی سەرەکی: کۆمپانیایەک بە ناوی هامسا کە ڕەزامەندی بەڕێوەبەرایەتیی ڤێرتەرنەری سلێمانی وەرگرتووە، چووەتە کوشتارگەی سلێمانی و داوای هاوکاری لە تیمی ڤێرتەرنەری کوشتارگەکە کردووە، بۆ ئەوەی نموونەی ئەو ئاژەڵانە وەربگرن کە بۆ سەربڕین دانراون، لەبەرامبەر ئەوەش پارە وەردەگرێت.

لێدوانی فەرمی: محەممەد محێدین، بەڕێوەبەری کارگێڕیی کوشتارگەی سلێمانی بە ئاڤا نیوزی گوت: "ئەو کۆمپانیایە داوای سامپڵی ئاژەڵەکان دەکات تا لە تاقیگەکان پشکنینیان بۆ بکات، بەڵام خاوەن ئاژەڵەکان لەبەر دواکەوتن و تێچووی پشکنینەکان، ئەمڕۆ هیچ ئاژەڵێکیان نەهێناوە و لەوە ناڕازین".

زانیاریی زیاتر: ڕۆژانە 450 تا 470 ئاژەڵی بچووک و نزیکەی 70 ئاژەڵی گەورە لە کوشتارگەی سلێمانی سەردەبڕدرێن. 

ئەوەش بزانە: بۆ سەربڕین و پاککردنی هەر ئاژەڵێکی گەورە 30 هەزار دینار و، بۆ هەر ئاژەڵێکی بچووکیش شەش هەزار دینار وەردەگیرێت. وێڕای ئەمە بەپێی زانیارییەکانی ئاڤا نیوز، کۆمپانیاکە بڕی دوو هەزار دیناری تر بۆ هەر پشکنینێک وەردەگرێت.