لە کێڵگەکانی پەتاتە هەلی کار بۆ سێ هەزار کەس دەڕەخسێنرێت

ئاڤا نیوز

لە بەردەڕەش بەرهەمی پەتاتە پێگەیشتووە و هەلی کاری بۆ سێ هەزار کەس پەیداکردووە.

وێنە گەورەکە: کابینەی نۆیەمی حکومەتی هەرێمی کوردستان لەگەڵ دەستبەکاربوونی، سیاسەتی زیادکردنی بەرهەمی نێوخۆیی و بەرزکردنەوەی ئاستی هەناردەکردنی گرتووەتەبەر.

لێدوانی فەرمی: تەحسین سلێمان، بەڕێوەبەری کشتوکاڵی بەردەڕەش بە ئاڤا نیوزی گوت: ئەمساڵ لە سنووری بەردەڕەش 25 هەزار دۆنم زەوی بە پەتاتە چێنراوە و 300 هەزار تۆن بەرهەمی هەیە.

زانیاریی زیاتر: بە پێگەیشتنی بەرهەمی پەتاتە نزیکەی سێ هەزار هەلی کاری ڕۆژانەی دابینکردووە، دەیان تۆن بەرهەمی پەتاتە هەناردەی پارێزگاکانی دیکەی هەرێمی کوردستان و عێراق دەکرێت، ئەمە جگە لە هەناردەکردنی دەرەوە.

خاڵی ئەرێنی: تەنیا بە بەرهەمی پەتاتەی قەزای بەردەڕەش دەتوانرێت بە ڕێژەی 75%ـی پێویستی هەرێمی کوردستان دابین بکرێت.

لە لایەکی دیکەوە: ڕۆژی 11-06-2024، سەرۆکوەزیران بارزانی سەردانی کێڵگەیەکی بەرهەمهێنانی پەتاتەی لە قەزای بەردەڕەش کرد و گوتی: بە هەموو شێوەیەک پشتیوانی جووتیاران دەبین و حکومەت لە کارکردن بۆ پەرەپێدانی زیاتری کەرتی کشتوکاڵ بەردەوام دەبێت.