یەکێتی هێزێکی نوێ دادەمەزرێنێت

ئاڤا نیوز

یەکێتیی نیشتمانیی کوردستان هێزێکی یەدەگ لە چوارچێوەی یەکەی 70 دادەمەزرێنێت، وەزارەتی پێشمەرگەش بێئاگایی خۆی لە دامەزراندنی ڕادەگەیێنێت.

چیرۆکی سەرەکی: چەند ڕۆژێک پێش ئێستا دەنگۆی دوورخستنەوەی 36 ئەفسەری باڵا لە لیوای سکرتاریەتیی تاڵەبانی بڵاوبووەوە، ئاڤا نیوز بەدواداچوونی بۆ بابەتەکە کرد و دەرکەوت هێزێکی نوێیان بۆ دامەزرێنراوە.

لێدوانی فەرمی: سەرچاوەیەکی باڵا لە هێزەکانی یەکەی 70ی پێشمەرگە بە ئاڤا نیوزی گوت: "ئەو 36 ئەفسەرە دەرنەکراون، بەڵکو گواستراونەتەوە نێو هێزی یەدەگی یەکێتی، ئەم هێزە کۆکەرەوەی ئەو پلەدارانەی یەکێتییە کە لەنێو هێزەکانی دیکە ناتوانرێت پۆستیان پێبدرێت و زیاتر کەسانی بەتەمەنن".

زانیاریی زیاتر: هێزەکە لە دوای کۆنگرەی چواری یەکێتی لە ساڵی 2019 بە قۆناغبەندی دامەزراوە، سەدان پلەدار و پێشمەرگە لەخۆدەگرێت و وەستا ڕەسوڵ سەرپەرشتی دەکات، لە هەموو ناوچەکانی کوردستانیش بارەگای هەیە.

لەلایەکی دیکەوە: سەرچاوەیەک لە سەرۆکایەتیی ئەرکان لە وەزارەتی پێشمەرگە بە ئاڤا نیوزی ڕاگەیاند: "هیچ فەرمانێک و ڕێنماییەک بۆ پێکهێنانی ئەو هێزە نییە، هەر هێزێک کە دادەمەزرێت پێویستە فەرمانی ڕاستەوخۆی ئەنجوومەنی وەزیرانی هەبێت، بەڵام تا ئێستا وەزارەتی پێشمەرگە ئاگای لە دامەزراندنی ئەو هێزە نییە".