ئێران 20 کەس بە گومانی تێوەگلان لە ڕووداوی کوشتنی هەنیە دەستگیر دەکات

ئاڤا نیوز

 

ئێران 20 ئەفسەر و بەرپرسی سەربازیی، بە تۆمەتی ئەوەی گومان دەکرێت دەستیان لە کوشتنی ئسماعیل هەنیە، سەرۆکی بزوتنەوەی حەماس هەبێت، دەستگیر کرد.

 

وێنە گەورەکە: تاران لێكۆڵینەوەیەکی تووند لە ڕووداوی کوشتنەکەی هەنیە دەکات، کە شەوی چوارشەممەی ڕابردوو لە تاران بە مووشەک لە میوانخانەیەک لە باکووری تاران کرایە ئامانج، بە گوێرەی هەواڵێکی 'نیۆڕک تایمز'، ئەو کەسانەی دەستگیرکراون، ئەفسەرانی هەواڵگریی و بەرپرسانی سەربازیی و چەند کارمەندێکی میوانخانەی سەربازی تارانی تێدایە.

 

ئەوەی پێویستە بیزانیت: دوای ڕووداوی کوشتنی هەنیە، ئێران خۆی بە بەرپرس دەزانێت لە دۆزینەوەی ئەو کەسانەی شوێنی هەنیەیان ئاشکرا کردووە، بۆ ئەمەش لێکۆڵینەوەی دەستپێکردووە و سوپای پاسداران ڕایگەیاندووە ' ئەنجامی لێکۆڵینەوەکە بۆ ڕای گشتی ئاشکرا دەکەن".

 

چی روویدا؟ دوای هێرشەکە، کارمەندانی ئاسایشی ئێران هەڵیانکوتایە سەر کۆمەڵگەی میوانخانەی سوپای پاسداران کە زۆرجار هەنیە تێیدا دەمێنێتەوە، تەواوی کارمەندانی میوانخانەکەیان دەستبەسەر کرد، هەندێکیان دەستگیرکرد و دەستیان بەسەر هەموو ئامێرە ئەلیکترۆنییەکاندا گرت.