بە بەشداریی سەرۆکوەزیران بارزانی لووتکەی حکومەتەکان لە دوبەی دەستپێدەکات

ئاڤا نیوز

بە بەشداریی سەرۆکوەزیران بارزانی لووتکەی جیهانیی حکومەتەکان لە دوبەی دەستپێدەکات و ئێوارەی ئەمڕۆ گوتارێک پێشکەش دەکات.

وێنە گەورەکە: ئەمڕۆ دووشەممە یانزەیەمین لووتکەی جیهانیی حکومەتەکان لە شاری دوبەی ئیمارات بە ناونیشانی "نەخشاندنی داهاتووی حکومەتەکان" دەستپێدەکات و تاوەکو 14 ی مانگ بەردەوام دەبێت.

زانیارییە بەدەستهاتووەکان: لە لووتکەکەدا نزیکەی 25 سەرۆک، پادشا، ئەمیر و سەرۆکوەزیران، نێردەی 85 ڕێکخراوی نێودەوڵەتی، 300 وەزیر و 120 شاندی حکومی ئامادەی لووتکەکە دەبن. تەوەری سەرەکی گفتوگۆکردنە دەربارەی داهاتووی ئابووریی جیهان، پیشەسازی، ژیری دەستکرد، سیستەمی بانکی و گۆڕانکارییەکانی کەشوهەوا.

ئەوەی پێویستە بیزانیت: سەرۆکوەزیران مەسرور بارزانی لەسەر بانگهێشتی شێخ محەمەد بن راشد ئال مەکتووم، جێگری سەرۆکی دەوڵەتی ئیمارات و سەرۆکی ئەنجومەنی وەزیران و حاکمی میرنشینی دوبەی، دوێنێ بۆ بەشداریکردن لە کۆڕبەندەکە گەیشتە دوبەی.

بۆچی گرنگە: سەرۆکوەزیران بارزانی ئێوارەی ئەمڕۆ لە کۆڕبەندەکەدا گوتارێک پێشکەش دەکات. لە کۆڕبەندەکەشدا چەندین دیدار و کۆبوونەوەی لەگەڵ بەرپرسان و بیرمەندان و خاوەنکارانی عەرەبی و هەرێمی و جیهانی دەبێت.