عێراق مانگانە ملیارێک دینار بۆ بەرەنگاربوونەوەی ماددە هۆشبەرەکان تەرخان دەکات

ئاڤا نیوز

ئەنجوومەنی وەزیرانی عێراق ڕەزامەندی دا مانگانە بڕی یەک ملیار دینار بۆ وەزارەتی ناوخۆ تەرخان بکرێت بەمەبەستی بەرەنگاربوونەوەی ماددە هۆشبەرەکان و کارتێکەرە دەروونییەکان.

وێنە گەورەکە: ڕۆژ لەدوای ڕۆژ بەکارهێنان و بازرگانیکردن بە ماددە هۆشبەرەکان لە عێراق لەزیادبووندایە،  ئامار و ڕاپۆرتە نێودەوڵەتییەکان بەردەوام هۆشداری دەدەن لەوەی خەریکە دەبێتە "ناوەندێکی ترسناک" لە ناوچەکەدا، دوێنێ سێشەممەش لە کۆبوونەوەی ئەنجوومەنی وەزیران بەوردی پرسەکە تاوتوێکرا.

ڕاگەیێنراوی فەرمی: ئەنجوومەنی وەزیران ڕەزامەندی دا لەسەر تەرخانکردنی یەک ملیار دینار بۆ بەڕێوەبەرایەتیی گشتیی کاروباری ماددە هۆشبەر و کارتێکەر دەروونییەکان لە وەزرەتی ناوخۆ، لەپێناو  بەرەنگاربوونەوە و سنووردارکردنی ماددە هۆشبەر و کارتێکەرە دەروونییەکان.

زانیاریی زیاتر: لە کۆبوونەوەی دوێنێدا سەرۆکوەزیران محەممەد شیاع سوودانی جەختی لەسەر پێداویستیی گرتنەبەری ڕێکاری تووند بەرامبەر بازرگانانی ماددە هۆشبەرەکان کردووەتەوە، داواشی لە سەرجەم وەزارەتەکان کردووە پاڵپشتیی وەزارەتەکانی تەندروستی و ناوخۆ بکەن لەمبارەیەوە.