زانیاریی نوێ لەبارەی هاوتاکردنی مووچەی خانەنشینان؛ وردبینیکردن تەواونەبووە

ئاڤا نیوز
 
وردبینیکردن لە لیستی هاوتاکراوی مووچەی خانەنشینان تەواو نەبووە، بۆیە مووچەی مانگی حەوت هاوشێوەی  مانگەکانی ڕابردوو دەدرێت.

وێنە گەورەکە: لە مانگی شەشەوە لیستی مووچەی خانەنشینانی هەرێمی کوردستان بەهاوتاکراوی بۆ بەغدا نێردراوە، لەوکاتیشەوە لیژنەیەک بۆ  وردبینیکردن لە لیستەکە پێکهێنراوە، بەڵام تاوەکو ئێستا کارەکانی تەواو نەبووە.

 

لێدوانی فەرمی: سەرچاوەیەک لە وەزارەتی دارایی و ئابووریی هەرێمی کوردستان بە ئاڤا نیوزی گوت، "لیژنەکە پێویستی بە 16 ڕۆژی دیکەیە، ئەگەر لەو ماوەیە کارەکانی تەواوبێت و هیچ گرفتێک دروست نەبێت، مووچەی مانگی هەشت یان دواتر بە هاوتاکراوی دەدرێت." 

ئەوەی  پێویستە بیزانیت: خانەنشینان مووچەی مانگی حەوت هاوشێوەی مانگەکانی ڕابردوو وەردەگرن و بڕیارە لە سبەی پێنجشەممەوە لەلایەن بەغداوە دەست بە خەرجکردنی بکرێت، دابەشکردنیشی دەکەوێتە هەفەتەی داهاتوو.

  
ئەمەش بزانە: لە هەرێمی کوردستان نزیکەی 230 هەزار خانەنشین هەیە، بڕی زیادبوونی مووچەیان لە 50 هەزارەوە بۆ 280 هەزار دینار دەبێت و ساڵی خزمەت و بڕوانامەش هەژمار دەکرێت، هاوتاکردنی مووچەشیان لەگەڵ  خانەنشینانی عێراق مانگانە پێویستی بە زیاتر لە 50 ملیار دینارە.